पुणे: पुणे शहरातील हडपसर उपनगरातील शेवाळवाडी भागात असलेल्या जॉयवीला सोसायटीमध्ये एका डिलिव्हरी बॉयला अत्यंत अमानुषपणे मारहाण केल्याची घटना समोर आली आहे. जेवणाचे पार्सल देण्यासाठी आलेल्या तरुण सुरक्षारक्षकांनान विचारता लिफ्टपर्यंत गेला, या साध्या कारणावरून हा मोठा वाद झाला. या प्रकरणी हडपसर पोलिसांनी 7 जणांवर गुन्हा दाखल केला आहे. अक्षय साहेबराव झेंडे (रा. कदमवाक वस्ती, इंदिरानगर, लोणीकाळभोर) या २९ वर्षीय तरुणाने या संदर्भात पोलीस ठाण्यात तक्रार दिली आहे.
जेवणाचे पार्सल देण्यासाठी गेलेल्या अक्षय यांना लिफ्टकडे जातांना पाहताच सुरक्षा रक्षक आणि इतरांनी अडवून शिवीगाळ करण्यास सुरुवात केली. अक्षय यांनी मदतीसाठी सोसायटीच्या चेअरमनशी संपर्क साधला असता, त्यांनी वाद मिटवण्याऐवजी उलट उपस्थित लोकांना अक्षयला मारहाण करण्यासाठी सांगितले.
मारहाणीचा हा प्रकार एवढ्यावरच थांबला नाही. दुसऱ्या गेटवर असलेल्या वॉचमननी देखील अक्षयला येऊन बेदम मारहाण केली. चेअरमन प्रत्यक्ष तिथे आल्यावर त्यांनी पुन्हा मारहाण करण्यास सांगितले. अक्षय तिथून निघत असताना दुचाकीने धडक देऊन त्यांना खाली पाडण्यात आले आणि लोखंडी रॉडने त्यांच्या डोक्यावर वार करून गंभीर जखमी केले गेले. नराधमांनी त्यांना गाडीच्या डिक्कीत घालून जीवे मारण्याची धमकी दिल्याचेही समोर आले आहे.
या गंभीर तक्रारीची दखल घेत हडपसर पोलिसांनी भारतीय न्याय संहितेच्या कलम 118(1), 324(2), 189(2), 190, 351(2) आणि 352 अंतर्गत सोसायटीचे चेअरमन, ४ सुरक्षारक्षक आणि इतर २ जणांवर गुन्हा नोंदवला असून पुढील तपास सुरु आहे.
