पुणे: लोणी काळभोर (Loni Kalbhor News) परिसरात आरपीआयची महिला (Pune News) नेत्या असल्याची धमकी देत एका व्यावसायिकाच्या 2 गुंठे जमिनीवर (Pune Crime) ताबा मिळवून ती हडप करण्याचा प्रयत्न झाल्याची घटना समोर आली आहे. या प्रकरणी तिघांविरोधात गुन्हा दाखल करण्यात आला आहे. ही घटना हवेली तालुक्यातील लोणी काळभोर ग्रामपंचायत हद्दीतील गट क्रमांक 1693 मध्ये बुधवार 24 डिसेंबर रोजी दुपारी घडली. (Latest Marathi News)
पोलीस सूत्रांनी दिलेल्या माहितीनुसार, याप्रकरणी हजीलाल शब्बीर शेख (वय 45, रा. मंत्री मार्केट, हडपसर, पुणे) यांनी लोणी काळभोर पोलीस ठाण्यात फिर्याद दिली आहे. त्यावरून रुपाली महादेव काळभोर, अशोक आणाराव सुर्यवंशी आणि प्रितम सावंत (सर्व रा. लोणी काळभोर, ता. हवेली, जि. पुणे) यांच्याविरोधात गुन्हा दाखल करण्यात आला आहे.
फिर्यादी हजीलाल शेख यांनी 2019 साली भाऊसाहेब फुले यांच्याकडून संबंधित जमीन खरेदी केली होती. या जमिनीची क प्रत तयार करून सिमेंटचे कंपाऊंड बांधण्यात आले असून गेल्या 7 वर्षांपासून ही जमीन शेख यांच्या ताब्यात आहे.
बुधवारी दुपारी सुमारे 2.45 वाजण्याच्या सुमारास आरोपी रुपाली काळभोर, अशोक सुर्यवंशी आणि प्रितम सावंत हे शेख यांच्या जमिनीजवळ आले. त्यांनी शिवीगाळ करत ही गायरान जमीन असल्याचा दावा केला आणि तुम्ही पुन्हा या ठिकाणी पाय ठेवायचा नाही, अशी धमकी दिली. तसेच, पुन्हा येथे आलात तर तुमच्यावर खोटा गुन्हा दाखल करून अडकवेल, मी आरपीआयची मोठी नेत्या आहे, असे म्हणत शेख यांना धमकावल्याचे फिर्यादीत नमूद करण्यात आले आहे. आरोपींनी जमिनीवर अतिक्रमण करण्याचाही प्रयत्न केला.
या घटनेनंतर हजीलाल शेख यांनी लोणी काळभोर पोलीस ठाण्यात तक्रार दाखल केली. त्यानुसार तिघांविरोधात गुन्हा दाखल करण्यात आला असून पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक पूजा माळी करत आहेत.
