लोणी काळभोर, ता. 12 : प्लॉट विक्रीच्या आमिषाने पाच लाख रुपये घेऊन (Loni Kalbhor News) फसवणूक केल्याप्रकरणी तिघांविरुद्ध लोणी काळभोर पोलीस ठाण्यात गुन्हा दाखल करण्यात आला आहे. या घटनेमुळे परिसरात खळबळ उडाली असून प्लॉट खरेदीच्या व्यवहारात नागरिकांनी अधिक सावध राहण्याची गरज निर्माण झाली आहे. (Latest Marathi News)
सतेश चंद्रशेखर पाषाणकर, राहुल लक्ष्मण सुतार व नितीन जगताप अशी गुन्हा दाखल करण्यात आलेल्या आरोपींची नावे आहेत. याप्रकरणी काळूराम बाळासाहेब लवांडे (वय 33, रा. शेवाळवाडी, पुणे) यांनी लोणी काळभोर पोलीस ठाण्यात तक्रार दाखल केली आहे.
पोलिसांनी दिलेल्या माहितीनुसार, सन 2023 मध्ये लोणी काळभोर हद्दीतील गट नं. 2/2, पाषाणकर बाग या ठिकाणी प्लॉटिंग करून विक्रीसाठी जाहिरातीचे फलक लावण्यात आले होते. त्या ठिकाणी एजंट म्हणून राहुल सुतार व नितीन जगताप हे प्लॉट विक्रीचे काम पाहत होते. 1 फेब्रुवारी 2023 रोजी फिर्यादी काळूराम लवांडे हे त्यांचे सहकारी ओंकार शेळके व गणेश शिंदे यांच्यासोबत प्लॉट पाहण्यासाठी गेले असता आरोपींनी त्यांना प्लॉट क्रमांक 47 व 40 दाखवले. त्या प्लॉटची किंमत 14 लाख रुपये असल्याचे सांगण्यात आले.
दरम्यान, 3 फेब्रुवारी 2023 रोजी टोकन म्हणून लवांडे यांनी 3 लाख रुपये तर गणेश शिंदे यांनी 2 लाख रुपये अशी एकूण 5 लाख रुपयांची रोख रक्कम आरोपींकडे दिली. त्यावेळी पावतीही देण्यात आली होती. मात्र त्यानंतर बराच काळ उलटूनही प्लॉटचे खरेदीखत करून देण्यात आले नाही. आरोपींकडे वारंवार पाठपुरावा करूनही टाळाटाळ करण्यात येत होती. अखेर 28 फेब्रुवारी 2025 रोजी व्यवहार पूर्ण करण्यासाठी बोलावण्यात आले असता आरोपींनी पूर्वीच्या रकमेत प्लॉट देण्यास नकार देत सध्याच्या बाजारभावानुसार 20 लाख रुपये द्यावे लागतील, अशी अट घातली.
फिर्यादी व त्यांच्या सहकाऱ्यांनी पैसे परत मागितले असता, आरोपींनी पावत्या खोट्या असल्याचे सांगत अरेरावीची भाषा वापरून शिवीगाळ केली व पैसे देण्यास नकार दिला आहे. याप्रकरणी फिर्यादी काळूराम लवांडे यांनी लोणी काळभोर पोलिस ठाण्यात फिर्याद दिली आहे. त्यानुसार सतेज पाषाणकर, राहुल सुतार व नितीन जगताप यांच्याविरुद्ध भारतीय न्याय संहिता कलम 352, 351(2), 318(4), 316(2) व 3(5) अन्वये गुन्हा दाखल करण्यात आला आहे.
