जेजुरी: खंडोबा गडाच्या (Jejuri News) परिसरात रविवारी घडलेली आगीची घटना प्रशासनाने गांभीर्याने घेतली आहे. निवडणुकीच्या विजयाचा आनंद साजरा करताना भंडाऱ्याने अचानक पेट घेतल्यामुळे मोठी खळबळ उडाली होती. या दुर्घटनेत दोन नगरसेविका आणि इतर काही नागरिक भाजले असून त्यांच्यावर सध्या उपचार सुरू आहेत. या पार्श्वभूमीवर अन्न व औषध प्रशासनाने जेजुरीत तपासणी मोहीम सुरू केली आहे. भेसळयुक्त भंडारा विकणाऱ्यांवर वचक बसवण्यासाठी ही कारवाई केली जात आहे.
या मोहिमेदरम्यान प्रशासकीय पथकाने बेळगावहून आलेला भंडाऱ्याचा एक टेम्पो ताब्यात घेतला. शहरात ठिकठिकाणी विक्रीसाठी ठेवलेल्या भंडाऱ्याचे काही नमुने देखील तपासणीसाठी घेण्यात आले आहेत. जेजुरी पोलिसांनी या कामात सहकार्य केले असून संशयास्पद मालाची जप्ती करण्यात आली आहे. भंडाऱ्यामध्ये ज्वलनशील रसायनांचा वापर होतो का, याचा शोध आता अधिकारी घेत आहेत. खासदार सुप्रिया सुळे यांनीही या परिस्थितीवर चिंता व्यक्त करत दोषींवर कारवाई करण्याची गरज व्यक्त केली होती.
गेल्या अनेक काळापासून जेजुरीतील ग्रामस्थ आणि देवस्थानचे पदाधिकारी केमिकलयुक्त भंडाऱ्यावर बंदी आणण्याची मागणी करत होते. यापूर्वी वारंवार तक्रारी करूनही योग्य पावले उचलली गेली नव्हती. मात्र आता ही दुर्दैवी घटना घडल्यानंतर यंत्रणेला जाग आली आहे. भविष्यात अशा घटना रोखण्यासाठी गडावर फक्त शुद्ध भंडाऱ्याचा वापर व्हावा, अशी अपेक्षा व्यक्त केली जात आहे.
