Indapur Accident : इंदापूर : इंदापूर शहराच्या बाह्य वळणावर ट्रक चालकाने अचानक ब्रेक लावल्यामुळे दोन कार एकमेकांवर धडकल्याची घटना घडली. या अपघातात दोन्ही कारचे मोठ्या प्रमाणात नुकसान झाले असून 6 प्रवासी किरकोळ जखमी झाले आहेत. जखमींना उपचारासाठी जवळच्या खाजगी रुग्णालयात दाखल करण्यात आले आहे.
मिळालेल्या माहितीनुसार, इंदापूर शहराच्या बाह्य वळणावरून वाहतूक सुरू असताना पुढे जाणाऱ्या ट्रक चालकाने अचानक ब्रेक लावला. त्यामुळे मागून येणाऱ्या कार चालकांना वाहनावर नियंत्रण ठेवता आले नाही आणि कार एकमेकांवर धडकल्या. अपघाताचा आवाज ऐकून आसपासच्या नागरिकांनी तातडीने घटनास्थळी धाव घेत मदतकार्य सुरू केले.
या अपघातात दोन्ही कारचे मोठे नुकसान झाले आहे. मात्र सुदैवाने कोणतीही जीवितहानी झाली नाही. जखमी प्रवाशांना तातडीने उपचारासाठी खाजगी रुग्णालयात नेण्यात आले. या घटनेमुळे काही काळ परिसरात वाहतूक कोंडीही निर्माण झाली होती.
