पिंपरी-चिंचवड: पिंपरी-चिंचवड शहरातून एक धक्कादायक घटना समोर आली आहे. शेजारी राहणाऱ्या 65 वर्षीय व्यक्तीने दोन सख्ख्या अल्पवयीन बहिणींवर लैंगिक अत्याचार केल्याचा आरोप आहे. या प्रकरणी वाकड पोलिसांनी तातडीने कारवाई करत आरोपीला अटक केली आहे. या घटनेनंतर परिसरात संतापाचे वातावरण निर्माण झाले आहे.
मिळालेल्या माहितीनुसार, पीडित मुलींचे कुटुंब आणि आरोपी दोघेही मजुरीचे काम करतात. घरातील सर्व सदस्य कामासाठी बाहेर गेले असताना 10 वर्षांची मुलगी आणि तिची 4 वर्षांची लहान बहीण घरी एकट्या होत्या. याच संधीचा गैरफायदा घेत आरोपी रमझान बागवान याने मोठ्या मुलीला आपल्या घरात नेऊन तिच्यावर अत्याचार केल्याचा आरोप आहे.
हा प्रकार शेजारी राहणाऱ्या एका महिलेच्या लक्षात आला. संध्याकाळी मुलींचे पालक घरी परतल्यानंतर संबंधित महिलेने त्यांना संपूर्ण घटना सांगितली. त्यानंतर पालकांनी मुलींशी संवाद साधला असता त्यांनी रडत आपल्यासोबत घडलेला प्रकार सांगितला.
चौकशीत धक्कादायक माहिती समोर आली आहे. आरोपीकडून मे महिन्यापासून हा प्रकार सुरू असल्याचा आरोप आहे. मोठ्या मुलीवर 4 वेळा तर लहान बहिणीवर 1 वेळा अत्याचार करण्यात आल्याचे समोर आले आहे. हा प्रकार कुणाला सांगितल्यास जीवे मारण्याची धमकी आरोपी देत असल्यामुळे दोन्ही मुली घाबरलेल्या होत्या. तसेच आरोपी मुलींना पोट कापायची धमकी द्यायचा. यामुळे चिमुकल्या फार घाबरल्या होत्या.
मुलींच्या कुटुंबीयांनी दिलेल्या तक्रारीनंतर वाकड पोलीस ठाण्यात आरोपीविरोधात पोक्सो कायदा आणि ॲट्रॉसिटी कायद्यानुसार गुन्हा दाखल करण्यात आला आहे. पोलिसांनी त्वरित कारवाई करत रमझान बागवान याला ताब्यात घेत अटक केली. या प्रकरणाचा पुढील तपास वाकड पोलीस करत आहेत.
