पुणे, ता. 29 : हडपसरमधील ससाणेनगर येथे रामनवमी निमित्त निघालेल्या मिरवणुकीदरम्यान झालेल्या तीव्र ध्वनीप्रदूषणाचा फटका एका ज्येष्ठ महिलेला बसून त्यांचा मृत्यू झाल्याची दुर्दैवी घटना गुरुवारी रात्री घडली. या घटनेमुळे परिसरात ध्वनीप्रदूषण आणि पोलिसांच्या निष्काळजीपणाबाबत तीव्र चर्चा सुरू झाली आहे.
मृत महिलेचे नाव रंजना रवींद्र जाधव (वय 65, रा. लेन नं. 12, ससाणेनगर, हडपसर) असे असून त्या सायंकाळी सुमारे आठच्या सुमारास मिरवणूक पाहण्यासाठी घराबाहेर आल्या होत्या. त्या वेळी परिसरात अनेक मिरवणुका सुरू असून मोठ्या आवाजात डीजे आणि गाण्यांचा दणदणाट सुरू होता.
प्रत्यक्षदर्शींच्या माहितीनुसार, जय श्रीरामाच्या घोषणांसह चित्रपटातील हिंदी गाणी मोठ्या आवाजात वाजवली जात होती. या कर्णकर्कश आवाजामुळे जाधव यांना अचानक अस्वस्थ वाटू लागले आणि चक्कर येऊन त्या खाली कोसळल्या.
घटनेनंतर परिसरातील नागरिकांनी तत्काळ त्यांना रिक्षामधून रुग्णालयात नेण्याचा प्रयत्न केला; मात्र चौकात मिरवणुकीमुळे झालेल्या वाहतूक कोंडीमुळे रिक्षाला मार्ग मिळण्यास उशीर झाला. रुग्णालयात पोहोचल्यावर डॉक्टरांनी तपासणी करून त्यांना उपचारापूर्वीच मृत घोषित केले.
दरम्यान, शासनाच्या नियमानुसार ध्वनीची मर्यादा 90 डेसिबलपेक्षा जास्त नसावी, असे स्पष्ट निर्देश असतानाही मिरवणुकीत मोठ्या प्रमाणात आवाजाचा वापर होत असल्याचे नागरिकांनी सांगितले. विशेष म्हणजे, परिसरात पोलीस बंदोबस्त असूनही ध्वनीप्रदूषणावर नियंत्रण ठेवले गेले नाही, अशी चर्चा स्थानिकांमध्ये रंगली आहे.
