दौंड, ता. 21 : घराच्या वाटणीसाठी आई-वडिलांना (Daund News ) मुलगा आणि सुनेने शिवीगाळ करत काठीने बेदम मारहाण करून जीवे मारण्याची धमकी देण्यात आल्याची घटना नुकतीच उघडकीस आली आहे. याप्रकरणी मुलगा व सुनेवर दौंड पोलीस ठाण्यात गुन्हा दाखल करण्यात आला आहे. हि घटना सोमवारी (ता. 16) सायंकाळी साडेसात वाजण्याच्या सुमारास नायगाव ता. दौंड येथे राहते घरासमोर घडली. (Latest Marathi News)
अमोल संजय काळे, प्रियंका अमोल काळे (रा. दोघे रा. नायगाव ता. दौंड) असे मारहाण करणाऱ्या मुलाचे व सुनेचे नाव आहे. याप्रकरणी आरोपी मुलाची आई मालन संजय काळे (वय 50, रा. नायगाव) यांनी दौंड पोलीस ठाण्यात फिर्याद दिली आहे. त्यानुसार दौंड पोलिसांनी आरोपी मुलगा आणि सुनेवर विविध कलमान्वये गुन्हा दाखल केला आहे.
पोलिसांनी दिलेल्या माहितीनुसार, फिर्यादी मालन काळे या त्यांचे पती संजय काळे यांच्यासह सोमवारी (ता. 16) सायंकाळी साडेसात वाजण्याच्या सुमारास घरासमोर थांबल्या होत्या. यावेळी त्यांचा शेजारी राहणारा मुलगा अमोल व सून प्रियंका तिथे आले. अमोलच्या हातात लाकडी काठी होती.
मुलगा अमोल याने “मला तुम्ही राहत असलेल्या घरात राहण्यासाठी हिस्सा द्या,” अशी मागणी केली. त्यावर आईने त्याला समजावून सांगताना म्हटले की, “तुला राहण्यासाठी आजीचे घर दिले आहे, आता हे घर तुला दिले तर आम्ही कुठे राहणार?”यामुळे अमोलने आई-वडिलांना अश्लील शिवीगाळ करण्यास सुरुवात केली.
वादाचे रूपांतर हाणामारीत झाले. यावेळी अमोलने आपल्या हातातील लाकडी काठीने वडील संजय काळे यांच्या डोक्यात, पाठीवर आणि हातावर जोरात प्रहार केले. पतीला वाचवण्यासाठी मालन काळे मध्ये पडल्या असता, मुलगा व सून प्रियंका या दोघांनी त्यांनाही हाताने बेदम मारहाण केली. “तुम्हाला बघून घेतो, जिवंत सोडणार नाही,” अशी धमकी देऊन आरोपी तिथून पसार झाले.
याप्रकरणी मालन काळे यांनी दौंड पोलीस ठाण्यात धाव घेऊन तक्रार दिली आहे. पोलिसांनी आरोपी अमोल काळे आणि प्रियंका काळे यांच्याविरुद्ध विविध कलमान्वये गुन्हा दाखल केला आहे. गुन्ह्याचा पुढील तपासपोलीस हवालदार म्हेत्रे करत आहेत.
