उरुळी कांचन, (पुणे) : खामगाव टेक (ता. हवेली) गावच्या हद्दीत वनविभागाच्या जमिनीवरील विद्युत रोहित्राचे (डीपी) नट-बोल्ट उचकटून त्यातील 30 हजार रुपयांच्या तांब्याच्या तारा चोरीला नेल्याची घटना उघडकीस आली आहे.
याप्रकरणी महावितरणमध्ये वरिष्ठ तंत्रज्ञ म्हणून कार्यरत असलेले सुनील संभाजी नव्हारे (वय 35, रा. डाळिंब रोड, उरुळी कांचन) यांनी उरुळी कांचन पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, 22 ऑक्टोबर रोजी सकाळी 10 ते 23 ऑक्टोबर रोजी सकाळी दहा वाजण्याच्या सुमारास खामगाव टेक गावच्या हद्दीतील वनविभागाच्या जमिनीवरील गट क्रमांक ७० मधील विद्युत रोहित्र चोरट्यांनी डीपीचे नट-बोल्ट उचकटून ते जमिनीवर पाडले. त्यानंतर डीपीमधील तेल सांडून नुकसान करत त्यातील तांब्याच्या तारा चोरून नेल्याचे फिर्यादीत म्हटले आहे.
शुक्रवारी (ता. 23) ग्रामस्थ दत्तात्रय सोपान थोरात यांनी फोनद्वारे या घटनेची माहिती नव्हारे यांना दिली. त्यानंतर त्यांनी घटनास्थळी जाऊन पाहणी केली. परिसरात चोरीस गेलेल्या तांब्याच्या तारांचा शोध घेतला; मात्र त्या मिळून आल्या नाहीत. महावितरणच्या कोरेगाव मूळ शाखा क्रमांक 2 येथील सहाय्यक अभियंता अमोल जाधव यांनी नुकसानीचा व चोरीचा पंचनामा केला. त्यानंतर शनिवारी (ता. 24) नव्हारे यांनी उरुळी कांचन पोलिसांत तक्रार दाखल केली.
दरम्यान, याप्रकरणी अज्ञात चोरट्यांविरोधात गुन्हा दाखल करण्यात आला असून तपास विकास लगस करीत आहेत.
