विशाल शिंदे
नसरापूर : भोर तालुक्यातील जांभळी येथे (Bhor News) धक्कादायक घटना घडली असून हॉटेलमध्ये झोपलेल्या 75 वर्षीय वृद्धाची अज्ञात बोथट हत्याराने हत्या करण्यात आल्याची घटना (Pune Crime) उघडकीस आली आहे. या प्रकरणी राजगड पोलीस स्टेशनमध्ये खूनाचा गुन्हा दाखल करण्यात आला असून हॉटेलमधील कामगारावर संशय व्यक्त करण्यात आला आहे. (Latest Marathi News)
पोलिसांनी दिलेल्या माहितीनुसार, फिर्यादी अनिल सखाराम रसाळ (वय 48, रा. जांभळी, ता. भोर) यांच्या मालकीचे ‘7/12 शेतकरी व्हेज-नॉनव्हेज हॉटेल’ नसरापूर ते वेल्हे रोडलगत आहे. दि. 24 मार्च रोजी रात्री 11.00 ते 25 मार्च रोजी सकाळी 9.00 या दरम्यान हॉटेलमध्ये ही घटना घडली.
मृत व्यक्ती किसन बापू सुर्वे (वय 75) हे फिर्यादीचे सासरे असून ते त्या रात्री हॉटेलमध्ये झोपले होते. याच दरम्यान, हॉटेलमध्ये काम करणारा सागर थापा (पूर्ण नाव व पत्ता अज्ञात) याने मोबाईल न दिल्याच्या रागातून सुर्वे यांच्या डोक्यात बोथट हत्याराने वार करून त्यांना गंभीर जखमी केले. या हल्ल्यात त्यांचा मृत्यू झाल्याचा संशय फिर्यादीने व्यक्त केला आहे.
घटनेची माहिती मिळताच पोलिसांनी घटनास्थळी धाव घेत पंचनामा केला. दि. 25 मार्च रोजी सायंकाळी 5.55 वाजता या प्रकरणी राजगड पोलीस स्टेशन गु.र.नं. 126/2026, भारतीय न्याय संहिता कलम 103 अन्वये खूनाचा गुन्हा दाखल करण्यात आला आहे.
या गुन्ह्याचा तपास सहाय्यक पोलीस निरीक्षक राठोड हे करत असून, प्रभारी अधिकारी पोलीस निरीक्षक गवळी यांच्या मार्गदर्शनाखाली तपास सुरू आहे. तसेच उपविभागीय पोलीस अधिकारी राजेंद्र सिंह गौर यांनीही घटनास्थळी भेट देऊन तपासाबाबत सूचना दिल्या.
दरम्यान, संशयित आरोपी सागर थापा फरार असून त्याचा शोध घेण्यासाठी पोलिसांनी विशेष पथके तयार केली आहेत. या घटनेमुळे जांभळी परिसरात भीतीचे वातावरण निर्माण झाले आहे.
