Pune Crime : पुणे शहराला ‘ड्रग्जमुक्त’ करण्याचे उद्दिष्ट समोर ठेवून पोलीस प्रशासनाने कारवाई तीव्र केली असताना, काही भाग अमली पदार्थांच्या विळख्यात खोलवर अडकले असल्याचे धक्कादायक वास्तव समोर आले आहे. पुणे पोलिसांच्या ताज्या विश्लेषणानुसार कोंढवा, येरवडा आणि खडक या भागांमध्ये ड्रग्जसंबंधित गुन्ह्यांचे प्रमाण सर्वाधिक आहे.
पोलीस आयुक्त अमितेश कुमार आणि सह आयुक्त रंजनकुमार शर्मा यांनी घेतलेल्या 1 महत्त्वाच्या गुन्हे आढावा बैठकीत यावर सखोल चर्चा झाली. केवळ साठा जप्त करण्यापुरती कारवाई न करता, ड्रग्जच्या संपूर्ण पुरवठा साखळीचा शोध घेण्याचे स्पष्ट आदेश देण्यात आले आहेत.
कोंढवा, लक्ष्मीनगर, येरवडा, काळेपडळ, खडक आणि लोणी काळभोर ही 6 पोलीस ठाणे ‘हॉटस्पॉट’ म्हणून ओळखली गेली आहेत. याशिवाय शिवाजीनगर, डेक्कन, कोथरूड, वारजे, पर्वती, मार्केटयार्ड, बाणेर, वानवडी, हडपसर, खराडी, वाघोली यांसह एकूण 17 ठाण्यांच्या हद्दीतही ड्रग्जची प्रकरणे मोठ्या प्रमाणावर आढळत आहेत. त्यामुळे शहरातील एकूण 22 पोलीस ठाण्यांवर विशेष जबाबदारी सोपवण्यात आली आहे.
या पार्श्वभूमीवर प्रत्येक ठाण्यात 1 स्वतंत्र ‘अँटी-ड्रग्ज पथक’ स्थापन केले जाणार आहे. 2 अधिकारी आणि कर्मचारी असलेल्या या पथकांना अत्याधुनिक ‘ड्रग्ज ॲनालायझर’ उपकरणे देण्यात येणार आहेत. यामुळे केवळ कारवाईच नाही, तर तपासाची गती आणि अचूकता वाढण्याची अपेक्षा आहे.
याशिवाय, नागरिकांच्या सहभागासाठी 1 विशेष ॲप सुरू करण्यात येणार आहे. या ॲपवर माहिती देणाऱ्यांची ओळख पूर्णपणे गोपनीय ठेवली जाईल. ‘माझा प्रभाग ड्रग्जमुक्त’ या उपक्रमाअंतर्गत स्थानिक नगरसेवकांनाही या मोहिमेत सहभागी करून घेण्यात आले आहे. पहिल्या टप्प्यात 4 प्रभागांमध्ये हा उपक्रम राबवला जाणार आहे.
