भिगवण: भिगवण (Bhigwan News) ग्रामपंचायतीतील उपसरपंच निवडीचा ‘संगीत खुर्ची’चा खेळ संपला आहे. उर्वरित दोन महिन्यांच्या कालावधीसाठी कपिल भाकरे यांची उपसरपंचपदी निवड करण्यात आली आहे. सरपंच गुरप्पा पवार यांच्या अध्यक्षतेखाली ही निवड प्रक्रिया पार पडली. बैठकीचे सर्व कामकाज ग्रामसेवक दत्तात्रय परदेशी यांनी पाहिले. मागील काही महिन्यांपासून भिगवण ग्रामपंचायतीमध्ये उपसरपंच बदलण्याचा क्रम जणू ठरलेला कार्यक्रमच बनला आहे. चेहरा बदलतो, पदाचा कालावधी बदलतो, पण ‘संगीत खुर्ची’चा हा खेळ मात्र सुरूच आहे.
सध्याच्या निवडीपेक्षाही पुढे होणाऱ्या बदलांचीच ग्रामस्थांमध्ये जास्त कुजबुज सुरू आहे. ग्रामपंचायत सदस्यांमध्ये पदासाठी होत असलेली अदलाबदल आणि मर्यादित कालावधीसाठी होणारी निवड यामुळे प्रशासकीय कामांवर परिणाम होतो की काय, अशी चर्चा सामान्य नागरिकांमध्ये सुरू आहे.
उपसरपंचपदी निवड झालेले कपिल भाकरे यांच्याकडून येत्या दोन महिन्यांत कोणते ठोस निर्णय किंवा कार्ययोजना राबवली जाईल, याकडे गावकऱ्यांचे लक्ष लागले आहे. अत्यंत कमी कालावधीसाठी पद मिळाल्याने भाकरे हे गावाच्या विकासासाठी नेमके कोणते महत्त्वाचे पाऊल उचलतात, हे पाहणे महत्त्वाचे ठरणार आहे.
“दोन महिन्यांसाठी उपसरपंच पदाची निवड करून सत्ता मिळवताना ‘संगीत खुर्ची’ शब्दाची वलगणा करून सत्तेवर असलेल्या सत्ताधारी यांनी या घटनेची पुनरावृत्ती करून जनतेच्या मताचा विश्वासघात केला आहे.”
— आप्पासाहेब गायकवाड
सरचिटणीस, भारतीय जनता पार्टी, पश्चिम इंदापूर
