पुणे: पुण्यात माजी नगरसेवक वनराज आंदेकर यांच्या हत्येनंतर सुरू झालेला गँगवॉरचा (टोळी संघर्ष) रक्तरंजित थरार अजूनही थांबलेला नाही. आंदेकर टोळीने आकाश मस्के याचा भाऊ अक्षय मस्के याच्यावर नुकताच जीवघेणा हल्ला झाला होता. बुधवारी (दि. 20) सातारा रोडवरील बालाजीनगर भागात अक्षय मस्केवर दोन पिस्तुलांमधून गोळीबार करण्यात आला आणि धारदार शस्त्रांनी वार करण्यात आले. या हल्ल्यात अक्षय गंभीर जखमी झाला असून सुदैवाने त्याचा जीव वाचला आहे.
विशेष म्हणजे, ४ ते ५ महिन्यांपूर्वीच एका मित्राने अक्षयला ‘तुझ्यावर पाळत ठेवली जात आहे’ असा इशारा दिला होता. दरम्यान, या हल्ल्यामागे आंदेकर टोळीचे गेल्या १ वर्षापासूनचे नियोजन होते, अशी धक्कादायक माहिती पोलीस तपासात समोर आली आहे.
उत्तर प्रदेशात रचला कट
हल्ल्याचा मुख्य सूत्रधार आवेज शेख हा आंदेकर टोळीतील कृष्णा आंदेकरचा अत्यंत जवळचा मानला जातो. आवेजवर यापूर्वी कोंढवा गोळीबार प्रकरणात ‘मोक्का’ (MCOCA) अंतर्गत कारवाई झाली होती. वनराज आंदेकरांच्या खुनानंतर आवेज शेखने उत्तर प्रदेशात आश्रय घेतला होता.
दरम्यान, चौकशीत समोर आलेल्या माहितीनुसार कारागृहात जाण्यापूर्वी कृष्णा आंदेकरने काही पिस्तुले आवेजकडे दिली होती. उत्तर प्रदेशातून परत आल्यानंतर आवेजने अक्षय मस्के एकटा सापडताच त्याच्यावर थेट हल्ला केला. यात स्वतः आवेजने गोळीबार केल्याचे समोर आले आहे.
गँगवॉरमध्ये आता आरोपींच्या नातेवाईकांना लक्ष्य केले जात आहे. यापूर्वी आयुष कोमकर आणि गणेश काळे यांची हत्या झाली असून, सोमनाथ गायकवाड व अनिकेत दुधभाते यांच्या नातेवाईकांवरही हल्ल्याचा कट होता.
