जळगाव: जळगाव जिल्ह्यात लाचलुचपत प्रतिबंधक विभागाने (ACB) लाच घेतल्याप्रकरणी अटक केलेले उपनिबंधक जगदीश बाबूराव बारी यांच्याविरुद्ध मोठी कारवाई केली आहे. एसीबीच्या पथकाने बारी यांच्या बँक लॉकरची झडती घेतली असता, त्यामध्ये सोन्या-चांदीचे दागिने आणि मोठी रोकड जप्त करण्यात आली आहे. या जप्त केलेल्या मालमत्तेची एकूण किंमत 1 कोटी 7 लाख 44 हजार 75 रुपये एवढी आहे. या कारवाईमुळे जळगाव जिल्ह्यात आणि शासकीय वर्तुळात प्रचंड खळबळ उडाली आहे.
बारी यांचे भुसावळमधील कॉसमॉस बँकेच्या शाखेत एक लॉकर असल्याची माहिती पोलिसांना मिळाली. त्यानुसार दोन पंचांच्या उपस्थितीत पोलिसांनी या लॉकरची तपासणी केली.
या झडतीमध्ये पोलिसांना ६६०.३३० ग्रॅम वजनाचे सोन्याचे दागिने मिळाले, ज्यात सोन्याचे हार, बांगड्या आणि सोन्याच्या बिस्किटांचा समावेश आहे. या सोन्याची आजची किंमत सुमारे 99 लाख 4 हजार 960 रुपये आहे. याशिवाय लॉकरमध्ये 8 लाख 36 हजार 500 रुपयांची रोकड आणि 2 हजार 625 रुपयांचे चांदीचे दागिनेही पोलिसांना आढळून आले आहेत. हा सर्व मुद्देमाल लाचलुचपत प्रतिबंधक विभागाने जप्त केला आहे.
ही संपूर्ण कारवाई लाचलुचपत प्रतिबंधक विभागाचे पोलिस उपअधीक्षक योगेश ठाकूर यांच्या नेतृत्वाखाली करण्यात आली असून पोलिस अंमलदारांच्या पथकाने महत्त्वाची भूमिका बजावली. लाचखोर उपनिबंधक जगदीश बारी यांना न्यायालयाने 23 मेपर्यंत पोलिस कोठडी सुनावली असून अधिक तपास सुरु आहे.
