पुणे: राज्याचे दिवंगत उपमुख्यमंत्री अजित पवार (Ajit Pawar Plane Crash) यांचा 28 जानेवारी रोजी झालेल्या विमान अपघातात मृत्यू झाल्यानंतर राज्यात शोककळा पसरली. मात्र या अपघातानंतर (Amol Mitkari) अपघात की घात असा सवाल सातत्याने उपस्थित केला जात आहे. शरद पवार गटाचे आमदार रोहित पवार (Rohit Pawar) यांनी यापूर्वीच तपासाबाबत अनेक शंका मांडल्या होत्या. आता राष्ट्रवादीचे आमदार अमोल मिटकरी यांनीही ब्लॅक बॉक्ससंदर्भात गंभीर प्रश्न उपस्थित करत नव्या चर्चेला तोंड फोडले आहे. (Maharashtra Politics)
अमोल मिटकरी यांनी सोशल मीडिया प्लॅटफॉर्म एक्सवर अपघातानंतरचा विमानाचा एक फोटो शेअर केला आहे. या फोटोमध्ये त्यांनी विमानाच्या टेल म्हणजे शेपटीकडे लक्ष वेधत ती पूर्णपणे सुस्थितीत असल्याचा दावा केला आहे. त्यांच्या मते, विमानाचा ब्लॅक बॉक्स सामान्यतः टेल भागात बसवला जातो. अपघाताच्या वेळी विमानाचा पुढील भाग सर्वाधिक नुकसानग्रस्त होण्याची शक्यता असते, तर टेल भाग अनेकदा तुलनेने सुरक्षित राहतो. त्यामुळेच ब्लॅक बॉक्स शेपटीत ठेवण्याची रचना असते, असे त्यांनी म्हटले आहे.
मिटकरी यांनी पुढे असा मुद्दा मांडला की, अपघातग्रस्त विमानाची शेपटी जळालेली किंवा पूर्णपणे नष्ट झालेली दिसत नाही. त्यामुळे ब्लॅक बॉक्सला गंभीर नुकसान होण्याचा प्रश्नच निर्माण होत नाही. तसेच ब्लॅक बॉक्स अत्यंत उच्च तापमान सहन करू शकतो आणि तीव्र आगीतही त्यातील डेटा सुरक्षित राहील, अशा प्रकारे त्याची निर्मिती केलेली असते. अशा परिस्थितीत ब्लॅक बॉक्स कसा जळाला किंवा त्याला मोठे नुकसान कसे झाले, हा मूलभूत प्रश्न आहे, असे त्यांनी म्हटले.
दरम्यान, या संदर्भात अधिकृत तपास यंत्रणेकडून आधीच तांत्रिक तपास सुरू असल्याची माहिती देण्यात आली आहे. मात्र राजकीय स्तरावरून उपस्थित होणाऱ्या या प्रश्नांमुळे अपघाताच्या चौकशीकडे पुन्हा एकदा सर्वांचे लक्ष वेधले गेले आहे.
