पुणे : धायरी परिसरात (Pune Dhayari Crime) एका तरुणाने गळफास घेऊन आत्महत्या केल्याची धक्कादायक घटना घडली. प्रेमाच्या बहाण्याने त्याला पैशांसाठी त्रास दिल्याचा आरोप असून, या प्रकरणी एका महिलेला अटक करण्यात आली आहे. तसेच तिच्या मुलीविरुद्धही गुन्हा दाखल करण्यात आला आहे. याबाबत मृत तरुणाच्या पत्नीने नांदेड सिटी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मृत तरुण विवाहित होता. आरोपी महिला धायरी परिसरात राहते. तिने तरुणाला प्रेमाच्या जाळ्यात ओढले आणि त्यानंतर धमकावून त्याच्याकडून पैसे उकळण्यास सुरुवात केली. महिला आणि तिच्या मुलीने त्याला वारंवार त्रास दिला. या सततच्या छळामुळे शनिवारी (13 सप्टेंबर) तरुणाने राहत्या घरात गळफास घेऊन आत्महत्या केली, असे पत्नीच्या फिर्यादीत नमूद आहे.
या प्रकरणी आरोपी महिला आणि तिच्या मुलीविरुद्ध आत्महत्येस प्रवृत्त केल्याचा गुन्हा दाखल करण्यात आला आहे. पोलिसांनी महिलेची अटक केली असून पुढील तपास पोलीस उपनिरीक्षक दत्तात्रय सावंत करत आहेत.
