Pune Crime : बिबवेवाडीमधल्या संत एकनाथनगर भागात सुशोभिकरणाच्या कामासाठी ठेवलेले पथदिवे आणि खांब चोरट्यांनी चोरून नेल्याचा प्रकार उघड झाला. पुणे महापालिकेच्या बिबवेवाडी क्षेत्रीय कार्यालयातील अभियंता शिवानंद अंकोलीकर यांनी या प्रकरणी पोलिसात तक्रार दिली आहे. Pune Crime
पोलिसांच्या माहितीनुसार, पुष्पमंगल कार्यालय ते संत एकनाथनगर या रस्त्यावर पथदिवे बसवण्याचे काम सुरू होते. हे दिवे आणि खांब पदपथावर ठेवलेले असताना चोरट्यांनी त्यावर हात साफ केला. जवळपास २ लाख ३० हजार रुपयांचा माल गायब झाला. चोरी लक्षात आल्यावर पोलिसांनी जागेची पाहणी केली तसेच परिसरातील सीसीटीव्ही फुटेज तपासायला सुरुवात केली आहे. चोरट्यांचा शोध सुरू असून तपास पोलीस उपनिरीक्षक माने करत आहेत.
यासह आणखीन २ ठिकाणी चोरीच्या घटना घडल्या
घोरपडीतील मोबाइल दुकान फोडून रोकड लंपास
घोरपडी गावातल्या एका मोबाइल दुकानाचा दरवाजा उचकटून चोरट्यांनी ५० हजार रुपयांची रोकड पळवली. दुकानाचे मालक गोविंद परदेशी यांनी मुंढवा पोलिसात फिर्याद दिली आहे. शनिवारी मध्यरात्री चोरट्यांनी दुकानात घुसून गल्ल्यातली रोकड उचलली. सकाळी दुकान उघडताना दरवाजा उचकलेला दिसला आणि चोरीचा प्रकार उघडकीस आला. या प्रकरणाचा तपास पोलीस हवालदार मोरे करत आहेत.
सिंहगड रस्ता परिसरात घरफोडी
सिंहगड रस्त्यावर हिंगणे खुर्द येथील सावित्री अपार्टमेंटमधील एका बंद सदनिकेचे कुलूप तोडून चोरट्यांनी रोकड आणि दागिने चोरून नेले. प्रशांत ढळे यांनी पोलिसात फिर्याद दिली आहे. चोरट्यांनी घरातील कपाट फोडून सुमारे ३८ हजार रुपयांचा ऐवज घेऊन पलायन केले. या प्रकरणाचा तपास सहायक पोलीस निरीक्षक अडगाळे करत आहेत.
