पुणे: धार्मिक श्रद्धेचा गैरफायदा घेत पुण्यातील (Pune Crime) एका दांपत्याची तब्बल 14 कोटी (Pune News) रुपयांची फसवणूक झाल्याचा धक्कादायक प्रकार उघडकीस आला आहे. ‘शंकर बाबा’ अंगात येतात असा दावा करून मुलीच्या आजारावर उपचार होईल, या आमिषाने दांपत्याला फसवण्यात आले. या प्रकरणी पुणे पोलिसांच्या गुन्हे शाखेने दीपक जनार्दन खडके, वेदिका कुणाल पंढरपूरकर आणि कुणाल पंढरपूरकर या तिघांना नाशिकमधून अटक केली आहे. आरोपींनी धार्मिक विश्वासाचा गैरफायदा घेत मोठ्या प्रमाणात आर्थिक फसवणूक केली असून, या प्रकरणाचा पुढील तपास सुरू आहे. पोलिसांकडून या फसवणुकीत इतर कोण सहभागी आहेत का, याचाही शोध घेतला जात आहे.
पीडित दांपत्य हे खाजगी कंपनीत नोकरी करणारे असून त्यांना दोन मुली आहेत. त्यापैकी एका मुलीस ‘अलोपेशिया’ हा आजार झाला होता, ज्यामुळे तिचे केस वाढत नव्हते. या दांपत्याला भजन आणि धार्मिक कार्यक्रमांची आवड असल्याने ते वेळोवेळी अशा कार्यक्रमांना जात असत. अशाच एका कार्यक्रमात त्यांची ओळख दीपक खडके या व्यक्तीशी झाली. खडके यांनी त्यांची ओळख वेदिका आणि कुणाल पंढरपूरकर यांच्याशी करून दिली. त्यावेळी वेदिकाबद्दल सांगण्यात आले की ती “शंकर बाबांची लेक” असून तिच्या अंगात देव येतो आणि ती कोणत्याही आजारावर उपाय करू शकते.
वेदिकाने दरबारात ‘शंकर बाबा’ अंगात आल्याचा अभिनय करून त्या दांपत्याला सांगितले की मुलीच्या आजाराचे दोष दूर करण्यासाठी त्यांना सर्व रक्कम तिच्याकडे द्यावी लागेल. तिच्या सांगण्यावरून दांपत्याने घर, शेती, परदेशातील मालमत्ता आणि दागदागिने विकून सुमारे 14 कोटी रुपये वेदिका आणि तिच्या साथीदारांना दिले.
ही फसवणूक तब्बल तीन वर्षे सुरू होती. या काळात वेदिकाने विविध धार्मिक विधींच्या नावाखाली पैसे घेतले. कधी नारळ, सुपारी, दगड घरात ठेवण्याच्या सूचना देऊन ती म्हणायची ही शेवटची पूजा आहे आणि आता सर्व काही ठीक होईल. मात्र, वर्षानुवर्षे गेल्यानंतरही मुलीच्या आजारात काहीही सुधारणा झाली नाही. शेवटी दांपत्याला फसवणुकीचा संशय आला आणि त्यांनी थेट पुणे पोलिस आयुक्त अमितेश कुमार यांच्याकडे तक्रार दाखल केली.
गुन्हे शाखेने तत्काळ कारवाई करत नाशिकमधून तिघा आरोपींना अटक केली. पोलिसांचा प्राथमिक अंदाज आहे की आरोपींनी श्रद्धा आणि अंधविश्वासाचा वापर करून योजनाबद्ध पद्धतीने ही फसवणूक केली. पुढील चौकशीत आणखी काही लोक या रॅकेटमध्ये सहभागी असण्याची शक्यता पोलिसांकडून व्यक्त करण्यात येत आहे.
