Pune Crime : पुणे जिल्ह्यात गेल्या काही दिवसांपासून काळा जादू, भानामती केल्याच्या धक्कादायक प्रकार घडताना दिसताय. खेड तालुक्यातील कडूस गावात भरदिवसा जादूटोणा केल्याचा एक अत्यंत धक्कादायक प्रकार उघडकीस आलाय. या घटनेचा CCTV व्हिडिओ समोर आला आहे. या प्रकारामुळे ग्रामस्थांमध्ये मोठी खळबळ माजली आहे. (Pune Crime)
नेमका काय प्रकार घडला?
गावातील एका जुन्या आणि बंद घराच्या दाराजवळ एक पुरुष आणि चेहरा झाकलेल्या अवस्थेतील एक महिला जादूटोणा करत असतानाचा संपूर्ण प्रकार थेट सीसीटीव्ही कॅमेऱ्यात कैद झाला. या घटनेचे फुटेज सोशल मीडियावर मोठ्या प्रमाणात व्हायरल झाले आहे.
सीसीटीव्ही फुटेजमध्ये, पुरुषाच्या हातात पिशवी असून, त्याने पिशवीतील साहित्य काढून घरासमोर मांडण्यात आलं आहे. या साहित्यामध्ये दही-भात, लिंबू, हळद-कुंकू आणि नारळ यांसारख्या साहित्यांचा समावेश होता. या व्यक्तीने लिंबूवर हळद-कुंकू लावून, त्या ठिकाणी नारळ फोडल्याचेही फुटेजमध्ये स्पष्टपणे कैद झाले आहे. ज्यामुळे अंधश्रद्धेच्या या कृत्याबद्दल ग्रामस्थांमध्ये भीतीचे वातावरण पसरले आहे.
स्थानिक नागरिकांनी हे विचित्र कृत्य पाहून काळाजादू करणाऱ्या पुरुषाला जाब विचारला असता, त्याने आपण मुंबईतून आल्याचे सांगितले. मात्र, ही पूजा कोणत्या उद्देशाने आणि कुणासाठी केली, याबाबत त्याने कोणतीही स्पष्ट माहिती दिली नाही. भर गावात आणि भर दिवसा अशा प्रकारचं कृत्य झाल्यामुळे कडूस गावात नागरिकांमध्ये भीतीचे वातावरण पसरले आहे. स्थानिक नागरिकांमध्ये मात्र, हा प्रकार जमिनीच्या वादातून कुणाला धमकावण्यासाठी किंवा त्रास देण्यासाठी केला गेला असल्याची जोरदार चर्चा आहे, ज्यामुळे घटनेला वेगळे वळण मिळण्याची शक्यता आहे.
पोलिसांनी केली कारवाई
स्थानिक पोलिसांना याची माहिती मिळाल्यानंतर त्यांनी तातडीने संबंधित व्यक्तीचा शोध सुरू केला आहे. हा संपूर्ण प्रकार अंधश्रद्धेपोटी केलेला जादूटोणा आहे की, जमिनीच्या वादातून केलेली ही युक्ती आहे, या दोन्ही शक्यता गृहीत धरून पोलीस कसून तपास करत आहेत. अशा प्रकारच्या कृत्यांमुळे अंधश्रद्धा पसरते आणि सामाजिक वातावरण बिघडते, त्यामुळे पोलिसांनी या व्यक्तींवर जादूटोणा विरोधी कायद्यानुसार कठोर कारवाई करावी, अशी मागणी जोर धरू लागली आहे.
