पुणे : पुण्याचे ग्रामदैवत म्हणून ओळख असलेल्या कसबा पेठेतील श्री गणपती मंदिरात चोरीची घटना घडल्याने खळबळ उडाली आहे. मंदिरात ठेवलेली दानपेटी फोडून चोरट्याने त्यातील सुमारे 60 हजार रुपयांची रोकड लंपास केल्याचे समोर आले आहे. या प्रकरणी फरासखाना पोलिसांनी एका संशयिताला अटक केली आहे.
पोलिसांनी संग्राम राजेंद्र जाधव (वय 29, रा. गडहिंग्लज, कोल्हापूर) याला ताब्यात घेतले आहे. मंदिर बंद झाल्यानंतर मध्यरात्रीच्या सुमारास तो परिसरात आला. त्याने मंदिराच्या प्रवेशद्वारावरील कुलूप तोडून आत प्रवेश केला. त्यानंतर मंदिरातील दानपेटीचे कुलूपही फोडले आणि त्यातील रोख रक्कम घेऊन तेथून निघून गेल्याचे तपासात समोर आले आहे.
सोमवारी रात्री पूजा आणि इतर धार्मिक विधी झाल्यानंतर मंदिर बंद करण्यात आले होते. याच संधीचा फायदा घेत चोरी करण्यात आल्याचे पोलिस तपासातून स्पष्ट झाले आहे.
मंगळवारी पहाटे पुजारी मंदिरात पूजा करण्यासाठी पोहोचले. त्यावेळी मंदिराचे कुलूप तुटलेले आणि दानपेटीची तोडफोड झाल्याचे त्यांच्या लक्षात आले. त्यांनी तातडीने मंदिराच्या विश्वस्तांना घटनेची माहिती दिली. त्यानंतर पोलिसांनाही कळवण्यात आले.
माहिती मिळताच फरासखाना पोलिसांचे पथक घटनास्थळी दाखल झाले. पोलिस उपायुक्त कृषीकेश रावले आणि सहपोलिस आयुक्त संजय दराडे यांनीही घटनास्थळी पाहणी केली. उपलब्ध पुरावे आणि तपासादरम्यान पोलिसांनी संग्राम जाधव याला ताब्यात घेऊन चौकशी केली. चोरीमध्ये त्याचा सहभाग असल्याचे निष्पन्न झाल्यानंतर त्याला अटक करण्यात आली. या प्रकरणाचा पुढील तपास फरासखाना पोलिसांकडून सुरू आहे.
