पुणे: नाशिकमधील भोंदू बाबाच्या प्रकरणानंतर आता पुण्यात उघडकीस आलेल्या (Pune Crime) आणखी एका धक्कादायक प्रकारामुळे राज्यात अंधश्रद्धा आणि पाखंडी धर्मगुरूंचा प्रश्न पुन्हा चर्चेत आला आहे. स्वतःला ‘महादेवाचा अवतार’ सांगत एका महिलेवर अत्याचार केल्याप्रकरणी ऋषिकेश वैद्य या स्वयंघोषित बाबाला पोलिसांनी अटक केली असून, तपासात नवनवीन धक्कादायक बाबी समोर येत आहेत. (Latest Marathi News)
याप्रकरणी सामाजिक कार्यकर्ते भूपेश पाटील यांनी दिलेल्या माहितीनुसार, 2018 सालीच ऋषिकेश वैद्य याच्याविरोधात एका अल्पवयीन मुलावर अत्याचार केल्याचा गंभीर आरोप झाला होता. मात्र, सामाजिक बदनामीच्या भीतीने संबंधित कुटुंबाने तक्रार मागे घेतल्याचे सांगितले जाते. या घटनेनंतरही काही सामाजिक कार्यकर्त्यांनी आणि तरुणांनी सोशल मीडियावरून या बाबाविरोधात आवाज उठवला होता, मात्र ठोस कारवाई झाली नाही.
तपासादरम्यान आणखी एक धक्कादायक बाब समोर आली आहे. आरोपीचा मोठा भाऊ धनंजयशास्त्री वैद्य हा स्वतःला पुरीच्या शंकराचार्यांचा शिष्य असल्याचा दावा करत होता. मात्र संबंधित पीठाकडून कोणताही संबंध नसल्याचे स्पष्ट करण्यात आल्याची माहिती भूपेश पाटील यांनी दिली. त्यामुळे या दोन्ही भावांनी धार्मिक आडोशाचा वापर करून लोकांची फसवणूक केल्याचे चित्र स्पष्ट होत आहे.
याशिवाय, घरगुती पूजा, अडचणी दूर करण्याचे उपाय किंवा धार्मिक विधी करण्याच्या नावाखाली 25 ते 40 हजार रुपये उकळल्याचेही आरोप समोर आले आहेत. विशेष म्हणजे, सध्याच्या प्रकरणातील पीडित तरुणी यापूर्वीच सामाजिक कार्यकर्त्यांच्या संपर्कात आली होती आणि तिला पोलिसांत तक्रार करण्याचा सल्लाही देण्यात आला होता.
