पुणे: पुण्यातील वाढत्या वाहनसंख्येमुळे दिवसेंदिवस तीव्र होत (Pune Traffic Jam) चाललेल्या वाहतूक कोंडीवर नियंत्रण मिळवण्यासाठी पुणे वाहतूक पोलिसांनी ‘ट्रॅफिकक्युअर’ या अत्याधुनिक सॉफ्टवेअरचा प्रायोगिक वापर सुरू केला आहे. देशात प्रथमच Google Maps च्या सहाय्याने विकसित करण्यात आलेली ही प्रणाली पुढील 3 महिने चाचणी तत्त्वावर राबवली जाणार आहे. प्रयोग यशस्वी ठरल्यास इतर महानगरांतही त्याची अंमलबजावणी होऊ शकते. (Latest Marathi News)
शहरातील सुमारे 550 कोंडीप्रवण ठिकाणांची ओळख पटवून त्यांचे 1000 हून अधिक सूक्ष्म सेगमेंट तयार करण्यात आले आहेत. प्रत्येक सेगमेंटमध्ये वाहनांचा सरासरी वेग, कोंडीची वारंवारता आणि तिची कारणे यांचे विश्लेषण केले जाते. Google Maps वरील लाल आणि गडद लाल रंगांच्या संकेतांवर आधारित कोंडीची तीव्रता मोजली जाते. वाहनांचा वेग ठरावीक मर्यादेपेक्षा कमी झाल्यास नियंत्रण कक्ष आणि संबंधित अधिकाऱ्यांच्या मोबाइलवर तत्काळ अलर्ट जातो, त्यामुळे तातडीने उपाययोजना शक्य होते.
या प्रकल्पांतर्गत शहरातील सुमारे 300 सिग्नल यंत्रणा एआय-आधारित रिअल टाइम सिंक्रोनायझेशनद्वारे नियंत्रित केल्या जाणार आहेत. कॅमेरे, रडार आणि स्मार्ट कंट्रोलरच्या मदतीने वाहतुकीच्या घनतेनुसार सिग्नलची वेळ आपोआप बदलली जाईल. त्यामुळे वाहनांचा अनावश्यक थांबा कमी होऊन प्रवास अधिक सुरळीत होईल, अशी अपेक्षा आहे.
या प्रणालीच्या विकासासाठी पुणे पोलीस आयुक्त अमितेश कुमार, सह पोलीस आयुक्त रंजन कुमार शर्मा आणि अप्पर पोलीस आयुक्त मनोज पाटील यांच्या मार्गदर्शनाखाली मागील 3 महिन्यांपासून प्रयत्न सुरू होते. ट्रॅफिकक्युअर प्रणाली ऐतिहासिक डेटा आणि रिअल टाइम माहिती यांची सांगड घालून संभाव्य स्लो-डाउनचा अंदाजही वर्तवते.
वाहतूक पोलीस उपायुक्त हिंमत जाधव यांच्या मते, अपघात, बेकायदेशीर पार्किंग, रस्त्यांवरील अडथळे किंवा सिग्नल बिघाड यांसारखी कारणे त्वरीत ओळखता येणार आहेत. वेगाने वाढणाऱ्या पुण्यासाठी ही प्रणाली स्मार्ट सिटीच्या दिशेने महत्त्वाचे पाऊल मानली जात आहे.
