Pune Politics: पुणे: पुण्यातील शिवसेनेचे (यूबीटी) माजी नगरसेवक संजय भोसले यांनी मंगळवारी भारतीय जनता पक्षात प्रवेश केल्यानंतर येरवडा-गांधीनगर परिसरात राजकीय वातावरण तापले आहे. भोसले यांच्या पक्षप्रवेशाला शिवसेना (यूबीटी) कार्यकर्त्यांनी तीव्र विरोध दर्शवत रस्त्यावर उतरून निदर्शने केली. या घटनेमुळे परिसरात काही काळ तणावाचे वातावरण निर्माण झाले होते.
निदर्शनांच्या सुरुवातीला कार्यकर्त्यांनी छत्रपती शिवाजी महाराजांच्या पुतळ्याला पुष्पहार अर्पण केला. त्यानंतर शिवसेना (यूबीटी) कार्यकर्त्यांनी संजय भोसले यांच्या फोटोंवर पाय देत जोरदार घोषणाबाजी केली. यावेळी भोसले यांना गद्दार संबोधण्यात आले. कार्यकर्त्यांचा रोष पाहता परिसरात पोलिस बंदोबस्त तैनात करण्यात आला होता.
या आंदोलनाचे नेतृत्व करणारे संजय वाल्हेकर यांनी यावेळी माध्यमांशी बोलताना आपली भूमिका स्पष्ट केली. ते म्हणाले की, आम्ही गेल्या 35 वर्षांपासून येरवडा परिसरात काम करत असून शिवसेना घराघरात पोहोचवली आहे. या भागातून अनेक शिवसेना कार्यकर्त्यांनी पुणे महानगरपालिकेत पक्षाचे प्रतिनिधित्व केले आहे. संजय भोसले हे देखील त्यापैकीच एक असून कार्यकर्त्यांच्या पाठिंब्यावर ते तीन वेळा नगरसेवक झाले.
वाल्हेकर यांनी आरोप केला की, सत्तेच्या लालसेपोटी भोसले यांनी पक्ष सोडला आहे. जर त्यांनी गेल्या 15 वर्षांत प्रभागात ठोस विकासकामे केली असती, तर आज त्यांना भाजपमध्ये जाण्याची वेळ आली नसती. प्रत्येक निवडणुकीत निष्ठावंत कार्यकर्त्यांवर अन्याय करण्यात आला असून आता महायुतीतील इतर इच्छुक उमेदवारांवरही अन्याय केला जात असल्याचा आरोप त्यांनी केला.
येरवडा-गांधीनगर परिसरातील जनता येत्या निवडणुकीत संजय भोसले यांना त्यांची जागा दाखवून देईल, असा इशाराही आंदोलनकर्त्यांनी दिला. या घटनेमुळे आगामी निवडणुकांच्या पार्श्वभूमीवर स्थानिक राजकारणात चांगलीच खळबळ उडाली आहे.
