Pune News: पुणे : पुणे (Pune) शहरातील बाणेर परिसरात एका सेवानिवृत्त अधिकाऱ्याने स्वतःच्या हक्काच्या घराच्या वादातून सातव्या मजल्यावरून उडी मारून आत्महत्या (Suicide) केल्याची धक्कादायक घटना घडली आहे. नरेश उमाकांत महाजन (वय 69) असे आत्महत्या केलेल्या व्यक्तीचे नाव आहे. करारानुसार फ्लॅट न मिळाल्याने ते मानसिक तणावात (Stress) होते. या प्रकरणी पोलिसांनी संबंधित बांधकाम व्यावसायिकांवर आत्महत्येस प्रवृत्त केल्याचा गुन्हा दाखल केला आहे.
नरेश महाजन हे मूळचे अंबरनाथ येथील रहिवासी होते. ते महावितरण मधून सेवानिवृत्त झाले होते. त्यांनी बाणेरमधील स्वतःची जागा विकसित करण्यासाठी बिल्डर जयंतीलाल ओसवाल यांच्याशी करार केला होता. करारानुसार इमारत पूर्ण झाल्यानंतर त्यांना त्या ठिकाणी एक फ्लॅट मिळणे अपेक्षित होते. मात्र, इमारत पूर्ण होऊनही त्यांना फ्लॅट देण्यात आला नाही.
फ्लॅट न मिळाल्याने नैराश्य
16 फेब्रुवारी रोजी महाजन अंबरनाथहून पुण्यात आले होते. त्यांनी बिल्डरकडे आपल्या हक्काच्या फ्लॅटची मागणी केली. मात्र, बिल्डर जयंतीलाल ओसवाल आणि रिषभ ओसवाल यांनी फ्लॅट देण्यास नकार दिला. तसेच त्यांना धमकावल्याचेही समोर आले आहे. या प्रकारामुळे महाजन खूप निराश झाले होते.
इमारतीच्या ७व्या मजल्यावरून उडी
त्याच दिवशी दुपारी सुमारे 12 वाजता महाजन यांनी संबंधित इमारतीच्या सातव्या मजल्यावर जाऊन उडी मारली. या घटनेत त्यांचा जागीच मृत्यू झाला. या प्रकरणी महाजन यांचा मुलगा मयूर महाजन यांनी बाणेर पोलीस ठाण्यात तक्रार दिली आहे.
पोलिसांनी जयंतीलाल ताराचंद ओसवाल (वय 56) आणि रिषभ ओसवाल (वय 30) यांच्यावर गुन्हा दाखल केला आहे. या घटनेमुळे परिसरात हळहळ व्यक्त होत असून, हक्काचे घर मिळावे म्हणून एका वृद्ध व्यक्तीला आपला जीव गमवावा लागल्याने नागरिकांमध्ये संतापाचे वातावरण आहे. पोलिस या प्रकरणाचा पुढील तपास करत आहेत.
