पुणे: पुण्यातील कोथरूड (Pune News) भागात मंगळवारी दुपारी एक धक्कादायक घटना घडली. बारावीचा पेपर देऊन बाहेर पडलेल्या एका 18 वर्षांच्या विद्यार्थ्यावर तीन मुलांनी कोयत्याने हल्ला केला. समोर आलेल्या माहितीनुसार, जखमी विद्यार्थी आणि हल्लेखोर मुले एकाच शाळेत शिकत होती. तेव्हा त्यांच्यात वाद झाला होता.
दरम्यान, आरोपी मुलांनी हा राग विसरण्याऐवजी 2 वर्ष मनात धरून ठेवला आणि आता त्यांनी कट रचून हल्ला केला. मुलगा बारावीची परीक्षा कुठे देणार आहे, याचे ‘रेकी’ करून आरोपींनी हा कट रचला होता.
विद्यार्थी परीक्षा संपवून आनंदाने बाहेर आला, तेव्हा दबा धरून बसलेल्या तीन मुलांनी त्याला गाठलं. काही समजण्यापूर्वीच त्यांनी त्याच्यावर धारदार कोयत्याने वार केले. समोर आलेल्या माहितीनुसार आरोपी मुलं अल्पवयीन असून त्यांना पोलिसांनी ताब्यात घेतले आहे. तर जखमी मुलावर रुग्णालयात उपचार सुरु आहेत. दरम्यान, भरवस्तीत आणि महाविद्यालयाच्या परिसरात घडलेल्या या घटनेमुळे परिसरात भीतीचे वातावरण पसरले आहे.
