पुणे: पुण्यातील कोथरूड (Pune News) परिसरात एका महिला वकिलाने पुरुषावर लैंगिक अत्याचार (Pune Crime) केल्याचा गुन्हा दाखल झाला आहे. कोल्हापुरातील एका व्यक्तीने पोलिसांत तक्रार देऊन ही माहिती दिली. गुंगीचे औषध देऊन अतिप्रसंग केल्याचा आरोप तक्रारदाराने केला आहे. तसेच खाजगी फोटो व्हायरल करण्याची धमकी देत दोन लाख रुपये मागितल्याचेही तक्रारीत नमूद आहे. तक्रारदाराला कोणत्याही कारणाशिवाय सतत त्रास दिला जात होता. या त्रासाला कंटाळून त्यांनी पोलिसांकडे धाव घेतली. कोथरूड पोलिसांनी या महिला वकिलाविरोधात गुन्हा दाखल केला असून पुढील तपास सुरू आहे. (Breaking News)
तक्रारदाराने सांगितले की, ७ नोव्हेंबर २०२४ रोजी ते कुटुंबीय आणि मित्रांसोबत तुळजापूरला दर्शनासाठी गेले होते. तेथे या महिला वकिलाची त्यांच्यासोबत ओळख झाली. त्यानंतर तिने त्यांच्या पत्नीचा फोन नंबर घेतला आणि वारंवार संपर्क साधू लागली. ती अनेकदा त्यांच्या घरी येऊन दोन दिवस राहिली. तिने स्वतःला हायकोर्टात प्रॅक्टिस करणारी वकील असल्याचे सांगितले होते. तिने तक्रारदाराला भाऊ मानले असल्याचेही सांगितले.
काही दिवसांनी ती कोल्हापुरात त्यांच्या घरी आली आणि त्यानंतर दोघे दुचाकीवरून बेळगावला कलावती मंदिरात दर्शनासाठी गेले. त्या वेळी तिने त्यांच्याजवळ येण्याचा प्रयत्न केला. तक्रारदाराने तिचा विरोध केला. तिने माफी मागितली. त्यानंतर चंदगड बसस्थानकाजवळ ‘मला वॉशरूमला जायचं आहे मी उघड्यावर जात नाही’ असं म्हणत ती लॉजवर घेऊन गेली. लॉजवर तिने पुन्हा चुकीचे वर्तन करण्याचा प्रयत्न केला. पुन्हा ती माफी मागून पुण्यात निघून गेली.
यानंतर ती सतत त्यांच्या पत्नीच्या संपर्कात राहिली. तिने काशी विश्वनाथ मंदिराला चल अशी विनंती केली. तक्रारदार तिच्यासोबत जाण्यास तयार झाले. पुण्यात आल्यानंतर ती त्यांना तिच्या घरी घेऊन गेली. ते झोपले असताना तिने काहीतरी पेय देऊन त्यांना बेशुद्ध करून अत्याचार केल्याचा आरोप आहे. त्यानंतर दोघे काशी विश्वनाथला गेले. तेथे तिने एकच रूम बुक केली आणि तीन दिवस जबरदस्तीने ठेवले. लग्न कर किंवा दोन लाख रुपये दे, नाहीतर पोलिसांत खोटी तक्रार करीन आणि फोटो व्हायरल करीन, अशी धमकी दिली. तक्रारदार कसेबसे सुटून कोल्हापूरला परतले. त्यानंतरही धमक्या सुरूच राहिल्या. अखेर त्यांनी पोलिसांत तक्रार दिली.
