Pune News: पुणे, ता. 10 : पुणे जिल्हा परिषदेच्या निवडणुकीत राष्ट्रवादी काँग्रेस (अजित पवार गट) पक्षाने 73 पैकी तब्बल 51 जागा जिंकत जिल्हा परिषदेत एकहाती सत्ता मिळवली आहे. या विजयानंतर आता जिल्हा परिषद अध्यक्ष, उपाध्यक्ष तसेच विविध सभापती पदांच्या निवडीसाठी राजकीय हालचालींना वेग आला आहे. विशेष म्हणजे समाजकल्याण विभागाचे अध्यक्षपद यंदा प्रथमच हवेली तालुक्याच्या वाट्याला येणार का, याबाबत जिल्ह्यात राजकीय चर्चा रंगू लागली आहे.
हवेली तालुक्याला आतापर्यंत जिल्हा परिषदेतील समाजकल्याण विभागाचे अध्यक्षपद कधीही मिळालेले नाही. मात्र यंदाच्या निवडणुकीत हवेली तालुक्यातील दोन सदस्य अनुसूचित जाती प्रवर्गातून विजयी झाल्याने या पदासाठी हवेलीचा दावा अधिक मजबूत बनत आहे. लोणी काळभोर-कदमवाकवस्ती-वडकी गटातून शीतल सुजित कांबळे आणि उरुळी कांचन-सोरतापवाडी गटातून जितेंद्र बाळासाहेब बडेकर हे राष्ट्रवादी काँग्रेसचे उमेदवार अनुसूचित जाती प्रवर्गातून निवडून आले आहेत. त्यामुळे समाजकल्याण विभागाच्या अध्यक्षपदासाठी या दोघांमध्येच थेट चुरस निर्माण झाली आहे. हवेली तालुक्याला यंदा हे महत्त्वाचे पद मिळाले, तर तालुक्याच्या राजकीय इतिहासात प्रथमच अशी नोंद होणार असल्याने स्थानिक राजकारणातही मोठी उत्सुकता निर्माण झाली आहे.
पुणे जिल्हा परिषदेचे कामकाज सामान्य प्रशासन विभाग, ग्रामपंचायत विभाग, कृषी विभाग, जिल्हा ग्रामीण विकास यंत्रणा, शिक्षण विभाग, बांधकाम विभाग, आरोग्य विभाग, महिला व बालकल्याण विभाग व समाजकल्याण विभागाच्या माध्यमातून चालते. समाजकल्याण विभागाच्या माध्यमातून जिल्हा परिषदेकडून अनुसूचित जाती तसेच इतर वंचित घटकांच्या सामाजिक, शैक्षणिक आणि आर्थिक उन्नतीसाठी विविध योजना राबविल्या जातात. वस्ती विकास, शिष्यवृत्ती, वसतिगृह सहाय्य, आंतरजातीय विवाह प्रोत्साहन, वृद्धाश्रम योजना, दिव्यांग कल्याण तसेच रोजगार व कौशल्यविकास उपक्रम यामध्ये प्रमुखत्वाने समाविष्ट आहेत.
जिल्हा परिषद आपल्या उत्पन्नातील किमान 20 टक्के निधी मागासवर्गीयांच्या कल्याणासाठी खर्च करते. वस्ती विकासासाठी 4 ते 40 लाखांपर्यंत निधी दिला जातो, तर आंतरजातीय विवाहासाठी 50 हजार रुपयांचे अनुदान उपलब्ध आहे. दिव्यांग व यशवंत निवारा योजनेंतर्गत घरकुलासाठी 1.20 लाख रुपये सहाय्य दिले जाते. तसेच ‘कमवा व शिका’ योजनेअंतर्गत विद्यार्थ्यांना दरमहा 12 ते 14 हजार रुपये विद्यावेतन दिले जाते. ‘समाजमंदिर ते ज्ञानमंदिर’ या योजनेतून समाजमंदिरांना ग्रंथालय व डिजिटल सुविधा उपलब्ध करून देण्याचा उपक्रमही राबविला जात आहे.
दरम्यान, राजकीय समीकरणे, गटबाजी आणि स्थानिक नेतृत्वाचा प्रभाव या सर्व गोष्टींच्या पार्श्वभूमीवर हवेली तालुक्याला समाजकल्याण विभागाचे अध्यक्षपद मिळते का, तसेच जिल्हा परिषदेत सत्ता मिळवलेल्या राष्ट्रवादी काँग्रेसमधील अंतर्गत समीकरणे कशी जुळतात, हे येत्या काही दिवसांत स्पष्ट होणार आहे.
जिल्हा परिषदेच्या अध्यक्षपदासाठी जोरदार चुरस
जिल्हा परिषद अध्यक्षपदासाठीही राजकीय वातावरण तापले असून या पदासाठी अनेक दिग्गजांच्या वारसांनी दावा केला आहे. अध्यक्षपद हे सर्वसाधारण प्रवर्गासाठी राखीव आहे. त्यामुळे दौंडचे माजी आमदार रमेश थोरात यांचे चिरंजीव तुषार थोरात, इंदापूरचे माजी आमदार हर्षवर्धन पाटील यांची कन्या अंकिता पाटील-ठाकरे, तसेच भोरचे माजी आमदार काशिनाथ खुटवड यांचे चिरंजीव विक्रम खुटवड हे इच्छुक असल्याची चर्चा राजकीय वर्तुळात सुरू आहे. याशिवाय माजी मंत्री व आंबेगावचे आमदार दिलीप वळसे पाटील यांचे पुतणे विवेक वळसे पाटील तसेच दौंड तालुक्यातील ज्येष्ठ सदस्य वीरधवल जगदाळे यांचीही नावे अध्यक्षपदासाठी पुढे येत आहेत. त्यामुळे जिल्हा परिषद अध्यक्षपदाची निवडणूकही अत्यंत प्रतिष्ठेची ठरणार असल्याचे स्पष्ट झाले आहे.
अंतिम निर्णय उपमुख्यमंत्री सुनेत्रा पवार घेणार
जिल्हा परिषद अध्यक्ष, उपाध्यक्ष तसेच समाजकल्याण विभागाचे अध्यक्षपद कोणाच्या वाट्याला जाणार, याबाबत अंतिम निर्णय राज्याच्या उपमुख्यमंत्री सुनेत्रा पवार घेणार असल्याचे बोलले जात आहे. त्या पुन्हा एकदा राजकीय घराण्यांवर विश्वास दाखवणार की नव्या चेहऱ्यांना संधी देणार, याकडे संपूर्ण जिल्ह्याचे लक्ष लागले आहे.
