Pune News: पुणे : शहरातील गणेशखिंड रस्त्यावर वाहतूक करणाऱ्या नागरिकांसाठी महत्त्वाची माहिती समोर आली आहे. कृषी महाविद्यालयासमोरील उड्डाणपुलावर दुरुस्तीचे काम सुरू करण्यात येणार आहे. पुणे महानगरपालिकेच्या विशेष प्रकल्प विभागाकडून हे काम हाती घेण्यात आले असून 28 फेब्रुवारी ते 27 मार्च या कालावधीत दररोज रात्री पुलावरील एक मार्गिका बंद ठेवली जाणार आहे. (Pune Traffic Diversion)
महापालिकेच्या माहितीनुसार, पुलावरील जॉईंट्स दुरुस्त करण्यासाठी हे पाऊल उचलण्यात आले आहे. दररोज रात्री 11 ते पहाटे 5 वाजेपर्यंत एक लेन वाहतुकीसाठी बंद असेल. या काळात सावित्रीबाई फुले पुणे विद्यापीठाकडे जाणाऱ्या बाजूची दोनपैकी एक मार्गिका बंद राहील. मात्र दुसरी मार्गिका वाहतुकीसाठी खुली ठेवली जाईल, त्यामुळे वाहनचालकांना पूर्णपणे अडथळा येणार नाही.
रात्रीच्या वेळी वाहतूक तुलनेने कमी असल्याने ही वेळ निवडण्यात आल्याचे अधिकाऱ्यांनी सांगितले. दररोज पहाटे 5 वाजल्यानंतर काम थांबवून बंद असलेली मार्गिका पुन्हा सुरू केली जाईल. त्यामुळे सकाळच्या गर्दीच्या वेळी वाहनचालकांना अडचण येणार नाही, असा दावा महापालिकेने केला आहे.
यापूर्वी या पुलावरील 14 बेअरिंग बदलण्याचे काम पूर्ण करण्यात आले होते. मात्र दिवसाच्या मोठ्या वाहतुकीमुळे सांध्यांच्या दुरुस्तीचे काम पुढे ढकलण्यात आले होते. आता हे काम पूर्ण झाल्यानंतर पुलाची सुरक्षितता आणि मजबुती वाढेल, अशी माहिती संबंधित विभागाकडून देण्यात आली आहे. वाहनचालकांनी या कालावधीत खबरदारी घेऊन पर्यायी मार्गांचा विचार करावा, असे आवाहन करण्यात आले आहे.
