पुणे: पुणे शहरातील जंगली महाराज रोडवर (Pune News) मंगळवारी भीषण आग लागल्याची घटना घडली. जंगली महाराज मंदिरासमोर असलेल्या एका पेट्रोल पंपाच्या (Jangali Maharaj Road Fire) मागील बाजूस चारचाकी वाहनांच्या दुरुस्तीच्या गॅरेजमध्ये अचानक आग भडकली. आगीचे मोठे लोट आकाशात उठताना दिसल्याने परिसरात एकच खळबळ उडाली. ही घटना दुपारच्या सुमारास घडली असून नेहमी गजबजलेल्या या परिसरात नागरिकांमध्ये भीतीचे वातावरण निर्माण झाले. (Latest Marathi News)
आग लागल्याची माहिती मिळताच पुणे अग्निशमन दलाच्या चार ते पाच बंबांनी तात्काळ घटनास्थळी धाव घेतली. अग्निशामक कर्मचारी युद्धपातळीवर आग आटोक्यात आणण्यासाठी प्रयत्न करत आहेत. पेट्रोल पंपाच्या अगदी जवळ ही आग लागल्याने मोठा धोका निर्माण झाला होता. सुरक्षेच्या दृष्टीने परिसरातील नागरिकांना काही काळासाठी दूर हलवण्यात आले. तसेच खबरदारी म्हणून पेट्रोल पंपाजवळील परिसर बंद ठेवण्यात आला.
सध्या आग पूर्णपणे विझवण्याचे काम सुरू आहे. आगीचे नेमके कारण अद्याप स्पष्ट झालेले नाही. गॅरेजमध्ये अनेक चारचाकी वाहने दुरुस्तीसाठी उभी होती. त्यामुळे या आगीत मोठ्या प्रमाणात नुकसान झाले असण्याची शक्यता वर्तवली जात आहे. मात्र नुकसानाचा नेमका आकडा अद्याप समोर आलेला नाही.
जंगली महाराज रोड हा पुण्यातील अत्यंत वर्दळीचा रस्ता असल्याने या आगीचा वाहतुकीवरही परिणाम झाला. काही काळासाठी या मार्गावरील वाहतूक संथ झाली होती. मात्र अग्निशमन दलाच्या तत्काळ आणि प्रभावी कारवाईमुळे आग पेट्रोल पंपापर्यंत पोहोचली नाही, त्यामुळे मोठी दुर्घटना टळली.
घटनास्थळी पोलिसांचाही बंदोबस्त तैनात करण्यात आला आहे. पोलिसांकडून आगीमागील कारणांचा तपास सुरू असून लवकरच अधिक माहिती समोर येईल, अशी माहिती प्रशासनाकडून देण्यात आली आहे. नागरिकांनी अफवांवर विश्वास न ठेवता प्रशासनाच्या सूचनांचे पालन करण्याचे आवाहन करण्यात आले आहे.
