पुणे: पुणे (Pune News) शहरात ज्येष्ठ नागरिकांसाठी आयोजित करण्यात आलेल्या एका अनोख्या ‘मॅच मेकिंग’ मेळाव्याचा व्हिडिओ सध्या सोशल मीडियावर मोठ्या प्रमाणात व्हायरल होत आहे. प्रसिद्ध इन्फ्लुएन्सर शेनाझ ट्रेजरी हिने या कार्यक्रमाची झलक इन्स्टाग्रामवर शेअर केली असून, प्रेमाला वयाचे बंधन नसते हे या उपक्रमाने पुन्हा एकदा सिद्ध केले आहे. या मेळाव्यामध्ये 60 ते 80 वर्षे वयोगटातील अनेक ज्येष्ठ नागरिक आपला नवीन जोडीदार शोधण्यासाठी उत्साहाने सहभागी झाले होते.
या मेळाव्याचे मुख्य उद्दिष्ट ज्येष्ठांमधील एकाकीपणा दूर करून त्यांना आयुष्याच्या प्रत्येक संध्याकाळी हक्काचा सोबती मिळवून देणे हे होते. सहभागी झालेल्यांमध्ये अनेक जण असे होते ज्यांनी आपला जोडीदार गमावला होता किंवा ज्यांचा घटस्फोट झाला होता. नवीन व्यक्तीला भेटताना या आजी-आजोबांच्या चेहऱ्यावरील आनंद आणि उत्साह एखाद्या तरुण जोडप्यासारखा होता. जात, धर्म किंवा सामाजिक प्रतिष्ठा बाजूला सारून येथे केवळ आपुलकी आणि मैत्रीला महत्त्व देण्यात आले होते.
येथे पाहा व्हिडीओ:
View this post on Instagram
अनेक ज्येष्ठांनी सांगितले की, आयुष्यभर कुटुंबासाठी झटल्यानंतर आता त्यांना स्वतःच्या सुखाचा विचार करायचा आहे. विशेषतः वाढलेला एकटेपणा दूर करण्यासाठी हा मेळावा एक आशेचा किरण ठरला आहे. सोशल मीडियावर या उपक्रमाचे मोठे कौतुक होत असून, समाजातील जुन्या विचारांना छेद देणारा हा प्रयत्न असल्याचे अनेकांनी म्हटले आहे. पुण्यातील या आगळ्यावेगळ्या मेळाव्यामुळे ज्येष्ठांच्या आयुष्यात पुन्हा एकदा नव्याने जगण्याची उमेद निर्माण झाली आहे.
