पुणे: पुणे (Pune News) महानगरपालिका निवडणुकीमध्ये एका तरुण चेहऱ्याची मोठी चर्चा रंगली आहे. भारतीय जनता पक्षाने प्रभाग क्रमांक 36 (क) मधून अवघ्या 22 वर्षांच्या सई थोपटे हिला उमेदवारी जाहीर केली असून, ती महाराष्ट्रातील सर्वात तरुण उमेदवार ठरली आहे. सई सध्या सिम्बायोसिस महाविद्यालयात बीबीएच्या शेवटच्या वर्षात शिकत आहे. कॉलेजमध्ये लेक्चर सुरू असतानाच तिला पक्षाचा फोन आला आणि तिच्या नव्या राजकीय प्रवासाला सुरुवात झाली.
सई गेल्या काही वर्षांपासून अखिल भारतीय विद्यार्थी परिषदेत काम करत आहे. या माध्यमातून तिने विद्यार्थ्यांचे प्रश्न सोडवण्यासाठी अनेक आंदोलने केली आहेत. तिची हीच कामाची पद्धत पाहून पक्षाने तिला निवडणुकीत संधी दिली आहे. राजकारणात तरुणांचा सहभाग वाढावा, या हेतूने सईला ही उमेदवारी मिळाल्याचे बोलले जात आहे. घराण्यातूनच तिला राजकारणाचे बाळकडू मिळाले असून तिचे वडील प्रशांत थोपटे हे भाजपचे जुने कार्यकर्ते आहेत. आमदार माधुरी मिसाळ यांनी सईच्या नेतृत्वावर विश्वास दाखवत तिला ही मोठी जबाबदारी दिली आहे.
विद्यार्थी दशेत असतानाच सईला ही संधी मिळाल्याने तरुणांमध्ये उत्साहाचे वातावरण आहे. राजकारणात नवीन चेहरे यावेत अशी अपेक्षा व्यक्त केली जात असताना सईच्या निमित्ताने एक सुशिक्षित आणि तरुण चेहरा समोर आला आहे. आता ही सर्वात तरुण उमेदवार पुणेकरांचा विश्वास जिंकण्यात यशस्वी होते का, हे पाहणे महत्त्वाचे ठरेल. सई सध्या आपल्या प्रभागात प्रचारासाठी उतरली असून मतदारांकडून तिला कसा प्रतिसाद मिळतो, याकडे सर्वांचे लक्ष लागले आहे.
