पुणे: पुणे जिल्ह्यातील 14 नगरपरिषद आणि 3 नगरपंचायतींच्या (Pune Election Result) निवडणुकीची मतमोजणी रविवारी सकाळपासून सुरू झाली. या निवडणुकांचे (Pune Politics) निकाल जाहीर होताच जिल्ह्यातील राजकीय चित्र स्पष्ट झाले आहे. एकूण 17 नगराध्यक्षपदांपैकी 10 ठिकाणी राष्ट्रवादी काँग्रेस अजित पवार गटाने विजय मिळवला आहे. शिवसेनेला 4 तर भाजपला 3 नगराध्यक्षपदे मिळाली आहेत. विशेष म्हणजे या निवडणुकीत महाविकास आघाडीला एकही नगराध्यक्षपद जिंकता आलेले नाही. नगराध्यक्षपदासाठी एकूण 119 उमेदवार रिंगणात होते. (Breaking News)
या निकालांमुळे पुणे जिल्ह्यात राष्ट्रवादी काँग्रेसचे वर्चस्व पुन्हा एकदा दिसून आले आहे. उपमुख्यमंत्री अजित पवार यांनी जिल्ह्यात आपली पकड कायम ठेवली असून स्थानिक स्वराज्य संस्थांमध्ये त्यांचा प्रभाव स्पष्ट झाला आहे. ग्रामीण आणि शहरी भागात राष्ट्रवादीला मिळालेल्या यशामुळे पक्ष कार्यकर्त्यांमध्ये उत्साहाचे वातावरण आहे.
नगरपरिषद आणि नगरपंचायतींमधील निकाल पाहता बारामती, लोणावळा, दौंड, शिरूर, इंदापूर, जेजुरी, भोर, वडगाव मावळ, माळेगाव आणि उरुळी-फुरसुंगी येथे राष्ट्रवादी काँग्रेसचे नगराध्यक्ष निवडून आले आहेत. या ठिकाणी राष्ट्रवादीने संघटनात्मक ताकद दाखवत स्थानिक मतदारांचा विश्वास संपादन केला आहे.
भाजपने तळेगाव, सासवड आणि आळंदी या तीन ठिकाणी नगराध्यक्षपदे जिंकली आहेत. तर शिवसेनेने चाकण, जुन्नर, राजगुरुनगर आणि मंचर येथे यश मिळवले आहे. काही नगरपरिषदांमध्ये नगरसेवकांचे बहुमत एका पक्षाकडे असले तरी नगराध्यक्षपद दुसऱ्या पक्षाला मिळाल्याने वेगळी राजकीय समीकरणे तयार झाली आहेत.
या निकालांनंतर पुणे जिल्ह्यातील स्थानिक राजकारण अधिक गतिमान होण्याची शक्यता आहे. विकासकामे, निधीचे नियोजन आणि स्थानिक प्रश्न यावरून आगामी काळात नगरपरिषद आणि नगरपंचायतींमध्ये राजकीय हालचाली वाढण्याची चिन्हे दिसत आहेत.
