Pune Crime: लोणी काळभोर, ता. 29 : दारू पीत असल्याचे नाव सांगितल्याच्या संशयावरून वायरमनला खल्लास करून टाकण्याची धमकी देऊन कुटुंबाला मारहाण (Fighting) केल्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील सिद्राम मळा परिसरात गुरुवारी (ता.27) रात्री साडेअकरा वाजण्याच्या सुमारास घडली आहे. या मारहाणीत दोघेजण जखमी झाले आहे तर लोणी काळभोर पोलीस ठाण्यात तिघांवर गुन्हा दाखल करण्यात आला आहे. Pune Crime
रामदास श्रीरंग शेलार (वय 43) व मालन श्रीरंग शेलार (दोघेही रा. आर्या हॉटेलचे पाठीमागे, नांदेपाटील वस्ती, सिद्राम मळा, लोणी काळभोर ता. हवेली जि.पुणे) अशी जखमी झालेल्या मायलेकाची नावे आहेत. तर शंभुराजे लक्ष्मण काळभोर (वय अंदाजे 22) व त्याचे वडील लक्ष्मण अशोक काळभोर व त्याची आई निता लक्ष्मण काळभोर (रा. भांडवस्ती, लोणी काळभोर, ता. हवेली) अशी गुन्हा दाखल झालेल्यांची नावे आहेत.
पोलिसांनी दिलेल्या माहितीनुसार, फिर्यादी रामदास शेलार महाराष्ट्र राज्य महावितरण कंपनीमध्ये कंत्राटी वायरमन म्हणून काम करतात. ते कुटुंबासोबत नांदेपाटील वस्ती परिसरात राहतात. शेलार हे गुरुवारी (ता.27) रात्री साडेदहा वाजण्याच्या सुमारास घरी झोपले होते. रात्री साडे अकरा वाजण्याच्या सुमारास शंभुराजे काळभोर हा शेलार यांच्या घराजवळ आला व त्याने दरवाज्यावर लाथा घालून तू घरातून एक मिनीटात बाहेर ये. असे म्हणुन शेलार यांच्या घराचा दरवाजा उघडू लागला.
शेलार हे घरातून बाहेर गेल्यानंतर शंभुराजे काळभोर म्हणाला की, माझे आजोबा अशोक रावसाहेब काळभोर यांना मी दारु पितो असे का सांगीतले. तेव्हा शेलार म्हणाले, मी त्यांना काहीही सांगीतले नाही. तेव्हा लगेच शंभुराजे काळभोर यावे शिवीगाळ करून तुला खल्लास करीन. तुला येथे राहू देणार नाही. असे म्हणुन शेलार यांना दमदाटी केली.
भांडणे ऐकल्यानंतर शेलार यांची आई मालन शेलार व पत्नी ज्योती या घराबाहेर आल्या. मालन शेलार यांनी शंभुराजे काळभोर याला विचारले की, तुझ्या आजोबाला कोणी, काय सांगीतले असे विचार असे सांगितले. शंभुराजे काळभोर याने दारात पडलेल्या विटा फेकुन मारायला सुरुवात केली. त्यापैकी एक शेलार यांच्या डाव्या डोळ्याजवळ लागली व एक विट पाठीवर लागली. व त्यानंतर शंभुराजे काळभोर हा पळत त्याच्या घरी निघून गेला.
दरम्यान, काही वेळानंतर शंभुराजे काळभोर हा त्याचे वडील लक्ष्मण काळभोर व त्याची आई निता काळभोर वय 35 यांना घेऊन आला व काहीही न विचारता त्या तिघांनी शेलार कुटुंबियांना लाथाबुक्क्यांनी मारहाण केली. तर शेजारील नागरिकांनी भांडणे सोडवली. परंतु, या भांडणात रामदास शेलार व मालन शेलार हे जखमी झाले आहेत.
रामदास शेलार यांनी याप्रकरणी लोणी काळभोर पोलीस ठाण्यात फिर्याद दिली आहे. त्यानुसार वरील तिघांच्या विरोधात भारतीय न्याय संहिता कलम 118(1), 115(2),351(2), 351(3), 3(5) व महाराष्ट्र पोलीस अधिनियम, 1951 कलम 37(1)37(2)37(3) 135 प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस हवालदार तेजस जगदाळे करत आहेत.
