Pune Crime : पुणे : नवी सांगवी परिसरात दोन जणांमधील वाद मिटवण्यासाठी गेलेल्या एका तरुणावर कोयता आणि दगडाने जीवघेणा हल्ला (Koyta Attack) करण्यात आल्याची गंभीर घटना घडली आहे. या घटनेमुळे परिसरात भीतीचे वातावरण निर्माण झाले असून जखमी तरुणावर उपचार सुरू आहेत. या प्रकरणी सांगवी पोलिस ठाण्यात गुन्हा दाखल करण्यात आला आहे. Pune Crime
मिळालेल्या माहितीनुसार, 19 फेब्रुवारी रोजी दुपारी सुमारे एक वाजण्याच्या सुमारास वाघजाई चौकाजवळील राजाराम नगर परिसरात अंशुमन कागडा आणि विकास उर्फ विशू कांबळे यांच्यात वाद सुरू होता. हा वाद मिटवण्यासाठी वेदांत मदने हा तरुण आपल्या काही मित्रांसह तेथे गेला होता. दोघांमधील भांडण थांबवून शांतता निर्माण करण्याचा त्याचा प्रयत्न होता.
मात्र, वेदांत मध्यस्थी करत असल्याचे पाहून प्रथमेश गणेश शिंदे व त्याच्यासोबत असलेल्या दोन अल्पवयीन मुलांना राग आला. त्यांनी स्वतःला परिसरातील प्रभावशाली व्यक्ती असल्याचे सांगत वेदांतला धमकावले. जुन्या वादातून त्यांनी वेदांतवर कोयत्याने वार केले तसेच दगडाने मारहाण केली. या हल्ल्यात वेदांत गंभीर जखमी झाला.
घटनेनंतर जखमी वेदांतला तातडीने रुग्णालयात दाखल करण्यात आले. या प्रकरणी वेदांतच्या आईने सांगवी पोलिस ठाण्यात फिर्याद दिली आहे. पोलिसांनी प्रथमेश शिंदे आणि दोन अल्पवयीन मुलांविरुद्ध खुनाचा प्रयत्न आणि इतर गंभीर कलमांखाली गुन्हा नोंदवला आहे.
सध्या पोलिस या घटनेचा अधिक तपास करत असून आरोपींचा शोध सुरू आहे. या घटनेमुळे परिसरातील नागरिकांमध्ये चिंता व्यक्त केली जात आहे.
