Pune Crime: पुणे : पुणे शहरातील कोंढवा परिसरात एका स्पा सेंटरच्या आड सुरू असलेल्या अनैतिक व्यवसायाचा पोलिसांनी पर्दाफाश केला आहे. एनआयबीएम रोडवरील एका आलिशान इमारतीत चालणाऱ्या ‘ओपल स्पा अँड सलून’वर गुन्हे शाखेच्या पथकाने छापा टाकून ही कारवाई केली. या कारवाईत चार महिलांची सुटका करण्यात आली असून स्पा सेंटरची व्यवस्थापिका पोलिसांच्या ताब्यात घेण्यात आली आहे.
पोलिसांना काही दिवसांपूर्वी माहिती मिळाली होती की, एनआयबीएम रोडवरील सनश्री वुड्स कमर्शिअल प्रिमायसेस या इमारतीतील स्पा सेंटरमध्ये मसाजच्या नावाखाली वेश्याव्यवसाय सुरू आहे. या माहितीची खात्री करण्यासाठी गुन्हे शाखेच्या अनैतिक मानवी वाहतूक प्रतिबंध कक्षाने शनिवारी एक बनावट ग्राहक पाठवला. संबंधित ठिकाणी व्यवहार निश्चित होताच पोलिसांनी तात्काळ छापा टाकत कारवाई केली.
या कारवाईदरम्यान पोलिसांनी टी. झुंचुमबीनी थम्फीयोलोथा खितान (वय 32, मूळ रा. नागालँड, सध्या रा. कोंढवा) हिला अटक केली. या प्रकरणातील आणखी एका मुख्य आरोपीचा शोध सुरू असल्याची माहिती पोलिसांनी दिली आहे. तसेच या ठिकाणाहून चार महिलांची सुटका करण्यात आली.
या प्रकरणी कोंढवा पोलीस ठाण्यात अनैतिक मानवी वाहतूक प्रतिबंधक कायद्यानुसार गुन्हा दाखल करण्यात आला आहे. शहरातील काही भागात स्पा आणि मसाज सेंटरच्या नावाखाली बेकायदेशीर प्रकार सुरू असल्याच्या तक्रारी येत असून अशा ठिकाणांवर पोलिसांची कारवाई सुरू राहणार असल्याचेही पोलिसांनी सांगितले.
