Pune Crime: पुणे : पुणे शहरात जबरी चोरी आणि घरफोडी करणाऱ्या सराईत गुन्हेगारांच्या टोळीला गुन्हे शाखा युनिट दोनच्या पथकाने अटक केली आहे. या कारवाईत आरोपींकडून २४ तोळे सोन्याचे दागिने, अडीच किलो चांदी आणि दुचाकी व चारचाकी वाहने असा सुमारे २९ लाख रुपयांचा मुद्देमाल जप्त करण्यात आला आहे. चोरीचे दागिने विकत घेणारे सराफ आणि मध्यस्थ यांनाही या गुन्ह्यात आरोपी करण्यात आले आहे. Pune News
गेल्या काही दिवसांपासून शहरात घरफोडी आणि जबरी चोरीच्या घटनांमध्ये वाढ झाली होती. या प्रकरणांचा तपास करताना पोलिसांनी तब्बल २०० ते २५० सीसीटीव्ही कॅमेऱ्यांचे फुटेज तपासले. आरोपी कोणत्या मार्गाने ये-जा करतात, कोणत्या वेळेला घटना घडवतात याचा सखोल अभ्यास करून पोलिसांनी सापळा रचला.
अटक करण्यात आलेल्या मुख्य आरोपींची नावे सनीसिंग पापसिंग दुधानी, जलसिंग राजपुतसिंग दुधान आणि मनीष बाबूलाल कुशवाह अशी आहेत. तसेच चोरीचे दागिने विकत घेणारे किरपाणसिंग शितलसिंग दुधानी, शांताराम उर्फ संतोष गुरप्पा कांबळे आणि अक्षय राजू चनाल यांनाही अटक करण्यात आली आहे.
आरोपी बंद घरांचे कुलूप आणि कोयंडा तोडून घरफोडी करत होते. हिंजवडी परिसरातून चारचाकी वाहन चोरून त्याच वाहनाचा वापर करून रावेत परिसरात घरफोडी करून सोने आणि चांदीचे दागिने लंपास करण्यात आले होते. घटनेनंतर आरोपी फरार झाले होते.
या प्रकरणाचा तपास सुरू असताना सीसीटीव्ही फुटेजच्या आधारे आरोपी जुना पुणे-मुंबई महामार्ग वापरून लोणावळ्याच्या दिशेने जात असल्याचे निष्पन्न झाले. त्यानंतर पोलिसांनी १२ जणांचे विशेष पथक तयार केले.
पोलीस उपायुक्त शिवाजी पवार आणि सहाय्यक पोलीस आयुक्त विशाल हिरे यांच्या मार्गदर्शनाखाली वरिष्ठ पोलीस निरीक्षक अरविंद पवार यांच्या नेतृत्वाखाली सोमटने फाटा टोलनाक्यावर सापळा रचण्यात आला. घरफोडीनंतर चोरीच्या वाहनातून येत असताना पोलिसांनी वाहन अडवून आरोपींना ताब्यात घेतले. चौकशीत आरोपींकडून १२ घरफोडीचे गुन्हे उघडकीस आले असून, मोठ्या प्रमाणात मुद्देमाल जप्त करण्यात आला आहे.
