अमित मुंडीक
पुणे: पर्वती पोलीस स्टेशनच्या हद्दीत चारचाकी (Pune Crime) पिकअप वाहन चोरीप्रकरणी पोलिसांनी आरोपीस अटक करून १४ लाख ०९ हजार रुपयांचा मुद्देमाल (Pune News) जप्त केला आहे. दि. १९ डिसेंबर २०२५ रोजी दाखल गुन्ह्यानुसार फिर्यादी यांच्या ताब्यातील एम. महिंद्रा पिकअप (किंमत ९ लाख रुपये) व त्यामधील ५ लाख २९ हजार रुपयांच्या इलेक्ट्रॉनिक वस्तू असा एकूण १४,२९,००० रुपयांचा मुद्देमाल अज्ञात चोरट्याने चोरी केला होता.
या प्रकरणाचा तपास वरिष्ठ पोलीस निरीक्षक नंदकुमार गायकवाड व पोलीस निरीक्षक (गुन्हे) अनिता हिवरकर यांच्या मार्गदर्शनाखाली सुरू होता. तपास पथकातील पोलीस अंमलदारांना मिळालेल्या गोपनीय माहितीनुसार सापळा रचून आरोपी शिवा मिड्डुलाल यादव (वय २०, रा. चिखली, पुणे) यास अत्यंत शिताफीने अटक करण्यात आली.
आरोपीच्या ताब्यातून चोरीस गेलेली एम. महिंद्रा पिकअप व इलेक्ट्रॉनिक वस्तूंचे बॉक्स असा एकूण १४,०९,००० रुपयांचा मुद्देमाल जप्त करण्यात आला आहे. आरोपीविरोधात पुढील तपास सुरू आहे.
ही कामगिरी अपर पोलीस आयुक्त राजेश बनसोडे, पोलीस उप-आयुक्त मिलिंद मोहिते व सहाय्यक पोलीस आयुक्त धन्यकुमार गोडसे यांच्या मार्गदर्शनाखाली पर्वती पोलीस स्टेशनच्या तपास पथकाने केली.
