पुणे: भवानी पेठ क्षेत्रीय कार्यालयात (Pune Crime) बंदोबस्तावर असलेल्या पोलीस निरीक्षक महिलेशी अरेरावी करून शिवीगाळ केल्याप्रकरणी उमेदवाराच्या भावाविरुद्ध खडक पोलीस ठाणे येथे गुन्हा दाखल करण्यात आला आहे. ही घटना भवानी पेठ क्षेत्रीय कार्यालयाच्या आवारात घडली असून, संबंधित पोलीस निरीक्षक महिलेने याबाबत खडक पोलीस ठाण्यात तक्रार दाखल केली आहे. (Latest Marathi News)
पोलिसांनी दिलेल्या माहितीनुसार, आरोपीचा भाऊ एका राजकीय पक्षाकडून उमेदवार असून भवानी पेठ क्षेत्रीय कार्यालयात प्रभाग क्रमांक 22, 23 आणि 24 मधील उमेदवारी अर्ज दाखल करणे तसेच इतर निवडणूकविषयक कामकाज सुरू होते. शुक्रवारी 2 जानेवारी रोजी उमेदवारी अर्ज माघारी घेण्याची अंतिम मुदत असल्याने कार्यालयाच्या आवारात कडेकोट बंदोबस्त ठेवण्यात आला होता.
यावेळी प्रवेशद्वारावर बंदोबस्तासाठी तैनात असलेल्या पोलीस निरीक्षक महिला आणि कर्मचाऱ्यांना आरोपीने प्रवेशद्वार उघडण्यास सांगितले. मात्र नियमांनुसार परवानगी नाकारण्यात आल्यानंतर आरोपीने प्रवेशद्वाराजवळ गोंधळ घालण्यास सुरुवात केली. या दरम्यान त्याने संबंधित पोलीस निरीक्षक महिलेशी अरेरावी करत अश्लील शिवीगाळ केल्याचे फिर्यादीत नमूद करण्यात आले आहे.
या घटनेनंतर खडक पोलिसांनी आरोपीविरुद्ध विनयभंग आणि निवडणूक आचारसंहिता भंग केल्याप्रकरणी गुन्हा दाखल केला आहे. प्रकरणाचा पुढील तपास सहायक पोलीस निरीक्षक हर्षल कदम करत असून, घटनेच्या अनुषंगाने अधिक चौकशी सुरू असल्याची माहिती पोलिसांनी दिली आहे.
