पुणे : पुण्यातुन मोठी अपडेट समोर आली आहे. शिवाजीनगर परिसरातील मंगला चित्रपटगृहासमोर दोन टोळ्यांच्या भांडणातून तरुणाचा खून करुन पसार झालेल्या आरोपीस दोन वर्षानंतर अटक करण्यात आली आहे. पंडीत अण्णा कांबळे (वय 29, रा. ताडीवाला रस्ता, पुणे स्टेशन) असे अटक केलेल्या आरोपीचे नाव आहे. मकोका अंतर्गत कारवाई केल्यानंतर आरोपी पसार झाला होता. त्याच्याकडून दोन पिस्तुले आणि चार काडतुसे जप्त करण्यात आली आहेत.
अधिक माहिती अशी की, आरोपी कांबळे आणि त्याच्या साथीदारांनी दोन गटातील भांडणातून मंगला चित्रपटगृहासमोर 15 ऑगस्ट 2013 रोजी नितीन मोहन म्हस्के (वय 35, रा. ताडीवाला रस्ता) याच्यावर कोयत्याने वार करून निर्घृण खून केला. या प्रकरणात शिवाजीनगर पोलिसांनी मकोका अंतर्गत कारवाई करत 17 आरोपींना अटक केली होती. मात्र कारवाई केल्यानंतर कांबळे पसार झाला होता. मागच्या दोन वर्षांपासून पोलीस त्याच्या मागावर होते. आरोपी कांबळे हा दत्तवाडी परिसरात येणार असल्याची माहिती पोलिसांना मिळाली. त्यानंतर पथकाने सापळा रचून त्याला पकडले. त्यावेळी त्याच्याकडून दोन पिस्तुले आणि चार काडतुसे जप्त करण्यात आली आहेत.
अल्पवयीन असताना आरोपी कांबळे याने एका तरुणाचा खून केला होता. यापूर्वी पिस्तूल विक्री प्रकरणातही त्याला अटक करण्यात आली होती, अशी माहिती परिमंडळ एकचे पोलीस उपायुक्त संदीपसिंग गिल यांनी दिली.
पोलीस उपायु्क्त संदीपसिंग गिल, सहायक आयुक्त साईनाथ ठोंबरे यांच्या मार्गदर्शनाखाली वरिष्ठ पोलीस निरीक्षक चंद्रशेखर सावंत, गुन्हे शाखेचे निरीक्षक चंद्रकात सूर्यवंशी, उपनिरीक्षक अजित बडे, हवालदार रुपेश वाघमारे, भाऊ चव्हाण, प्रमोद मोहिते, राजकिरण पवार, महावीर वलटे, अतुल साठे, सचिन जाधव, प्रवीण दडम, सुदाम तायडे, श्रीकृष्णा सांगवे यांनी ही कारवाई केली.
