पुणे: पुण्यातील कोथरुड परिसरात किरकोळ कारणावरून सुरू झालेला वाद (Pune Crime) हिंसक वळण घेत घरात घुसून मारहाण आणि तोडफोडीपर्यंत पोहोचल्याची धक्कादायक घटना समोर आली आहे. या प्रकरणी पोलिसांनी 7 जणांविरुद्ध गुन्हा दाखल केला असून त्यापैकी 5 जणांना अटक करण्यात आली आहे. मात्र, स्थानिक पातळीवर मुख्य आरोपीचे नाव गुन्ह्यात समाविष्ट नसल्याची चर्चा सुरू आहे. (Latest Marathi News)
गणजय सोसायटी परिसरात राहणाऱ्या राहुल गायकवाड (वय 22) यांनी याबाबत तक्रार दिली आहे. त्यांच्या म्हणण्यानुसार, 15 मार्च रोजी रात्री ते आणि त्यांचे मित्र परिसरातून जात असताना काही जणांनी “वस्तीमध्ये का फिरता” असा सवाल करत वाद घातला. स्थानिकांच्या हस्तक्षेपाने तो वाद त्या वेळी मिटला होता. मात्र याच घटनेचा राग मनात ठेवून आरोपींनी काही दिवसांनी सूड उगवला.
19 मार्च रोजी रात्री सुमारे 10:30 वाजण्याच्या सुमारास राहुल गायकवाड हे कुटुंबासोबत घरी जेवत असताना आरोपींचा गट घरात घुसला. मोठ्या आवाजात आरडाओरडा करत त्यांनी घरात दहशत निर्माण केली. दरवाजे, भिंती, स्वयंपाकघरातील वस्तूंवर धारदार हत्याराने वार करत मोठ्या प्रमाणात तोडफोड करण्यात आली. खिडक्यांवर दगडफेक करूनही नुकसान करण्यात आले.
यावेळी राहुल आणि त्यांच्या कुटुंबीयांना लाथाबुक्क्यांनी मारहाण करण्यात आली. त्यांना वाचवण्याचा प्रयत्न करणाऱ्या शेजाऱ्यांनाही धमकावण्यात आले. सोसायटीच्या पार्किंगमध्येही आरोपींनी दहशत माजवत आणखी दोन तरुणांना मारहाण केली. या हल्ल्यात काही जण जखमी झाले असून त्यांच्यावर ससून रुग्णालयात उपचार सुरू आहेत.
या प्रकरणी पोलिसांनी गुन्हा दाखल करून कारवाई सुरू केली असली तरी मुख्य सूत्रधाराविरोधात कारवाई झालेली नसल्याची चर्चा स्थानिकांमध्ये आहे. पोलिसांनी मात्र फिर्यादीने दिलेल्या नावांनुसारच गुन्हा नोंदवला असून पुढील तपासात आणखी कारवाई होईल, असे स्पष्ट केले आहे.
