अमित मुंडीक
पुणे: कोथरूड पोलीस स्टेशन हद्दीत (Pune Crime) मोक्का अंतर्गत गंभीर गुन्ह्यांमध्ये सहभागी असलेल्या निलेश घायवळ टोळीतील दोन आरोपींना कोथरूड पोलिसांनी अटक करत मोठी कारवाई केली आहे. कोथरूड पोलीस स्टेशन गुन्हा रजिस्टर क्रमांक 250/2025, 251/2025 आणि 277/2025 अन्वये (Pune News) गंभीर स्वरूपाचे गुन्हे दाखल असलेले मनीष रामकृष्ण माथवड (वय 28, रा. शोभा संकुल अपार्टमेंट, गणेश कॉलनी, कोथरूड) आणि चिक्या उर्फ ओंकार शाम फाटक (वय 26, रा. संत ज्ञानेश्वर कॉलनी, कोथरूड) या दोघांना अटक करण्यात आली आहे.
या दोन्ही आरोपींवर भारतीय न्याय संहिता अंतर्गत कलम 11(2), 189(1)(2), 191(2)(3), 190, 329(4), 308(2)(4)(5), 352, 351(1)(3), 296 तसेच शस्त्र अधिनियम 1959 चे कलम 3(25) आणि क्रिमिनल लॉ अमेंडमेंट कायदा कलम 3 व 7 अंतर्गत गुन्हे दाखल आहेत. या प्रकरणांमुळे संबंधित आरोपींविरोधात मोक्का अंतर्गत कारवाई करण्यात आलेली आहे.
कोथरूड पोलीस स्टेशनच्या डी.बी. पथकातील पोलीस अंमलदार विष्णू राठोड आणि आकाश वाल्मिकी यांना गेल्या 8 दिवसांपासून आरोपी कोथरूड परिसरात येणार असल्याची माहिती मिळत होती. त्या माहितीनुसार पोलीस उपनिरीक्षक मोहन चव्हाण, पोलीस अंमलदार विष्णू राठोड आणि आकाश वाल्मिकी यांनी सापळा रचला. 31 डिसेंबर रोजी पेट्रोलिंगदरम्यान आरोपी कोथरूड परिसरात आढळून आले. त्यानंतर तात्काळ कारवाई करत दोघांनाही ताब्यात घेण्यात आले.
ही कारवाई पोलीस उपायुक्त संभाजी कदम (परिमंडळ 3, पुणे शहर), सहाय्यक पोलीस आयुक्त शीतल जानवे (कोथरूड विभाग), वरिष्ठ पोलीस निरीक्षक संदीप देशमाने आणि पोलीस निरीक्षक (गुन्हे) अनिल माने यांच्या मार्गदर्शनाखाली पार पडली. या कारवाईत सहाय्यक पोलीस उपनिरीक्षक आळेकर, सहाय्यक पोलीस उपनिरीक्षक कदम, तपास पथकाचे पोलीस उपनिरीक्षक मोहन चव्हाण तसेच पोलीस अंमलदार विष्णू राठोड, आकाश वाल्मिकी, मयूर पांढरे आणि प्रवीण मांडवकर यांनी सहभाग घेतला.
