पुणे: कृषी सेवक म्हणून (Pune Crime) कार्यरत असताना गैरहजर (Pune News) असूनही वेतन व भत्ते मिळत नसल्याच्या रागातून एका कृषी सेवकाने थेट जिल्हा अधीक्षक कृषी अधिकारी कार्यालयात घुसून गोंधळ घातल्याची घटना समोर आली आहे. या घटनेत संबंधित व्यक्तीने कार्यालयातील संगणक फोडला असून, कर्मचाऱ्यांना कोयता दाखवून धमकावल्याचा प्रकार घडला आहे. (Latest Marathi News)
याप्रकरणी जिल्हा अधीक्षक कृषी अधिकारी कार्यालयातील वरिष्ठ लिपिक रमेश लक्ष्मण सकपाळ (वय 57) यांनी अलंकार पोलीस ठाण्यात फिर्याद दिली आहे. त्यानुसार पोलिसांनी सचिन शशिकांत कांबळे (वय 40, रा. कबाडवाडी, ता. जुन्नर) याच्याविरोधात गुन्हा दाखल केला आहे. ही घटना 23 डिसेंबर रोजी दुपारी 12 वाजता एरंडवणे येथील म्हात्रे पुलाशेजारी असलेल्या डीटीसी सेंटरमधील जिल्हा अधीक्षक कृषी अधिकारी कार्यालयात घडली.
पोलिसांनी दिलेल्या माहितीनुसार, सचिन कांबळे हे कृषी विभागात कृषी सेवक म्हणून कार्यरत होते. 2014 मध्ये कामात हलगर्जीपणा केल्याच्या कारणावरून त्यांना निलंबित करण्यात आले होते. त्यानंतर त्यांनी महाराष्ट्र प्रशासकीय न्यायाधिकरणात दाद मागितली होती. न्यायाधिकरणाने त्यांना पुन्हा सेवेत रुजू करून घेण्याचा आदेश दिला होता. मात्र, त्या निर्णयानंतरही सचिन कांबळे प्रत्यक्ष कामावर रुजू झाले नाहीत. दरम्यानच्या काळात त्या वेळचे अनेक अधिकारी व कर्मचारी यांची बदली झाली आहे.
आपण गैरहजर असतानाही वेतन व भत्ते मिळत नसल्याचा राग मनात धरून सचिन कांबळे यांनी मंगळवारी थेट जिल्हा अधीक्षक कृषी अधिकारी कार्यालयात प्रवेश केला. त्यांनी अधीक्षक कृषी अधिकारी यांच्या कक्षात जाऊन तेथील संगणक फोडून नुकसान केले. तसेच फिर्यादी आणि इतर कर्मचाऱ्यांना कोयता दाखवत शिवीगाळ केली आणि कोणीही कार्यालयात काम करू नये, अशी धमकी दिली. या प्रकारामुळे सरकारी कामकाजात अडथळा निर्माण झाला.
अलंकार पोलिसांनी सरकारी कामात अडथळा आणणे, धमकी देणे आणि शासकीय मालमत्तेचे नुकसान केल्याप्रकरणी गुन्हा दाखल केला असून, सहाय्यक पोलीस निरीक्षक येसणे पुढील तपास करत आहेत.
