पुणे: पिंपरी-चिंचवडमध्ये सायबर गुन्ह्यांचा वाढता धोका (Pune Crime) पुन्हा एकदा समोर आला आहे. स्वतःला सीबीआय अधिकारी असल्याचे भासवून अज्ञात मोबाईलधारकांनी मोरवाडी परिसरातील एका व्यक्तीकडून तब्बल 35 लाख रुपयांची ऑनलाईन फसवणूक केल्याची घटना उघडकीस आली आहे. ही फसवणूक 22 जानेवारी ते 31 जानेवारी 2026 या कालावधीत टप्प्याटप्प्याने करण्यात आली.
या प्रकरणी संत तुकाराम नगर पोलिस ठाण्यात तीन अज्ञात आरोपींविरोधात गुन्हा दाखल करण्यात आला असून 13 फेब्रुवारी रोजी फिर्याद नोंदवल्यानंतर तपासाला वेग देण्यात आला आहे. प्राथमिक माहितीनुसार, आरोपींनी संबंधित व्यक्तीला फोन करून स्वतःची ओळख सीबीआय अधिकारी म्हणून करून दिली. तुमच्याविरुद्ध गंभीर गुन्हा दाखल होणार आहे, तुमची बँक खाती तपासाअंतर्गत आहेत, अशी भीती दाखवून त्यांना मानसिक दबावाखाली आणण्यात आले.
यानंतर “प्रकरण मिटवण्यासाठी” आणि “तपासातून नाव वगळण्यासाठी” वेगवेगळ्या कारणांखाली पैसे भरण्याची मागणी करण्यात आली. भीतीपोटी संबंधित व्यक्तीने आरोपींनी सांगितलेल्या विविध खात्यांमध्ये एकूण 35 लाख रुपये ट्रान्सफर केले. काही दिवसांनंतर आपली फसवणूक झाल्याचे लक्षात येताच त्यांनी पोलिसांकडे धाव घेतली.
पोलिसांनी नागरिकांना स्पष्ट इशारा दिला आहे की, कोणताही सरकारी अधिकारी फोनवरून पैसे मागत नाही. सीबीआय, पोलिस, बँक किंवा इतर शासकीय संस्थांच्या नावाने फोन करून आर्थिक व्यवहार करण्यास सांगितले जात असल्यास त्वरित सावध व्हावे. अज्ञात कॉल, व्हिडिओ कॉल, संशयास्पद लिंक किंवा OTP शेअर करणे टाळावे.
पिंपरी-चिंचवडसह राज्यभरात अशा प्रकारच्या “डिजिटल अटक” आणि “अधिकारी बनून धमकी” देणाऱ्या फसवणुकीचे प्रकार वाढले आहेत. नागरिकांनी कोणताही व्यवहार करण्यापूर्वी खात्री करावी आणि संशयास्पद प्रकार आढळल्यास तत्काळ सायबर हेल्पलाईन 1930 किंवा जवळच्या पोलिस ठाण्यात संपर्क साधावा, असे आवाहन करण्यात आले आहे.
