पुणे: पुण्यात ज्येष्ठ नागरिकांच्या विश्वासाचा (Pune Crime) गैरफायदा घेत फसवणूक केल्याचा अत्यंत धक्कादायक प्रकार उघडकीस आला आहे. मुलबाळ कोणी नसल्याने काळजी घेण्यासाठी निवृत्त लष्करी अधिकाऱ्याने नेमलेलाच केअर टेकर त्यांच्या आयुष्याच्या साठवलेल्या कमाईवर डल्ला मारत तब्बल 1 कोटी 11 लाख रुपयांची फसवणूक केल्याचे समोर आले आहे. या प्रकरणामुळे वृद्धांच्या सुरक्षिततेचा आणि केअर टेकर व्यवस्थेवरील विश्वासाचा प्रश्न गंभीरपणे उपस्थित झाला आहे.
मेजर बोमन इरुशॉ अमारिया (वय 87, रा. पुण्यधाम वृद्धाश्रम, कोंढवा) हे निवृत्त लष्करी अधिकारी असून, वय आणि प्रकृतीच्या कारणामुळे ते वृद्धाश्रमात राहायला गेले होते. दैनंदिन गरजांसाठी त्यांनी केअर टेकर नेमला होता. मात्र, याच केअर टेकरने त्यांच्या एकटेपणाचा फायदा घेत इतर साथीदारांच्या मदतीने अमारिया यांचे धनादेश चोरले आणि बँकेतून परस्पर रक्कम काढली.
मार्च 2025 पासून आजपर्यंत बँक ऑफ इंडियाच्या कॅम्प शाखेतून ही फसवणूक सुरू असल्याचे तपासात उघड झाले आहे. संशयास्पद व्यवहार लक्षात आल्यानंतर अमारिया यांनी लष्कर पोलीस ठाण्यात तक्रार दाखल केली. त्यानुसार पोलिसांनी सुप्रितसिंग भुपेंद्र कंडारिया (वय 39, रा. माधव सोसायटी, कोथरूड) याला अटक केली असून केअर टेकर राज शहा आणि अन्य आरोपींविरोधात गुन्हा दाखल करण्यात आला आहे.
प्राथमिक तपासात आरोपींनी धनादेशांचा गैरवापर करून मोठ्या रकमा काढल्याचे स्पष्ट झाले आहे. पोलिसांकडून आर्थिक व्यवहारांची सखोल चौकशी सुरू असून आणखी किती जण या फसवणुकीत सामील आहेत, याचा शोध घेतला जात आहे.
हा प्रकार केवळ आर्थिक फसवणूक नसून, ज्येष्ठ नागरिकांच्या असुरक्षिततेवर मारलेला घाव आहे. एकाकी वृद्धांची काळजी घेताना केअर टेकरची पार्श्वभूमी तपासण्याची गरज किती महत्त्वाची आहे, हे या घटनेतून पुन्हा अधोरेखित झाले आहे.
