पुणे: पुणे शहरातील वाढत्या वाहतूक कोंडीला (Hadapsar-Yavat Elevated Route ) तोडगा काढण्यासाठी रिंग रोडसह महत्त्वाच्या पायाभूत प्रकल्पांना (Hadapsar Gadital) प्रशासनाने गती दिली आहे. रिंग रोडच्या पूर्व भागाचे काम 2028 पर्यंत, तर पश्चिम भागाचे काम 2026 पर्यंत पूर्ण (Hadapsar News) करण्याचे उद्दिष्ट ठेवण्यात आले आहे. पूर्व भागातील 12 पैकी 9 पॅकेजेसची कामे सुरू झाली असून उर्वरित 3 पॅकेजेस प्रशासकीय मान्यतेच्या टप्प्यात आहेत. या तिन्ही पॅकेजेसची निविदा प्रक्रिया मेपूर्वी पूर्ण करून ऑक्टोबरपासून प्रत्यक्ष काम सुरू करण्याचा प्रस्ताव आहे. (Latest Marathi News)
दरम्यान, हडपसर ते यवत या उन्नत मार्गाच्या प्रस्तावामुळे सोलापूर रस्त्यावरील विद्यमान उड्डाणपुलांवर हातोडा पडण्याची शक्यता व्यक्त होत आहे. गाडीतळ आणि नोबेल हॉस्पिटलजवळील उड्डाणपूल हटवावे लागण्याची शक्यता अधिकाऱ्यांनी वर्तवली आहे. उन्नत मार्गाचे रॅम्प या चौकांवर उतरविल्यास वाहतूक सुरळीत होईल, असा युक्तिवाद केला जात आहे.
हडपसर-लोणी काळभोर मेट्रो मार्ग आणि हडपसर-यवत उन्नत मार्ग हे एकत्रितपणे उभारण्याचा निर्णय घेण्यात आला आहे. उन्नत मार्गाच्या वर मेट्रो धावणार असल्याने दुहेरी पूल उभारणीची जबाबदारी महामेट्रोकडे देण्यात आली आहे. हा मार्ग भैरोबा नाल्यापासून सुरू होणार आहे. यापूर्वी पुणे विद्यापीठासमोरील उड्डाणपूल मेट्रोसाठी पाडण्यात आला होता; त्याच धर्तीवर सोलापूर रोडवरील उड्डाणपूल पाडण्याचा पर्याय तपासला जात आहे.
मात्र, सोलापूर रस्त्यावर आधीच प्रचंड वाहनांची वर्दळ आहे. अशा परिस्थितीत विद्यमान पूल पाडून नव्याने उभारणी करणे हे प्रशासनासमोर मोठे आव्हान ठरणार आहे. वाहतूक विस्कळीत न होता प्रकल्प पूर्ण करणे, पर्यायी मार्गांची व्यवस्था आणि नागरिकांना कमीत कमी त्रास देणे ही कसोटी असणार आहे.
रिंग रोड आणि उन्नत मार्ग पूर्ण झाल्यास पुण्याच्या वाहतुकीत मोठा दिलासा मिळण्याची अपेक्षा आहे; मात्र त्या दिशेने जाणारा प्रवास आव्हानांनी भरलेला असणार, हेही तितकेच स्पष्ट आहे.
