खेड-शिवापूर, ता. 1: देहुरोड ते सारोळा दरम्यान पुणे-सातारा रस्त्यावरील राष्ट्रीय महामार्ग प्राधिकरणाच्या हद्दीतील अतिक्रमणे हटविण्याची कारवाई सोमवारपासून (ता.3मार्च) करण्यात येणार आहे. तरी या रस्त्यावर ज्यांची अतिक्रमणे असतील त्यांनी तत्काळ काढून घ्यावीत. अन्यथा सबंधितांवर आपत्ती व्यवस्थापन कायदा 2005 अन्वये कारवाई करण्यात येईल, असे राष्ट्रीय महामार्ग प्राधिकरणाकडून पत्रकाद्वारे कळविण्यात आले आहे.
राष्ट्रीय महामार्ग प्राधिकरणाच्या हद्दीत पुणे-सातारा रस्त्यावर देहूरोड ते सारोळा दरम्यान अनेक ठिकाणी अनधिकृत होर्डिंग, स्टॉल, केबल आदींचे अतिक्रमणे झाल्याचे आढळून आले आहे. या अतिक्रमणांमुळे महामार्गावर अपघातांचे प्रमाण वाढले आहे. या पार्श्वभूमीवर सोमवारपासून (ता.3मार्च) ही अतिक्रमणे काढण्याची कारवाई करण्यात येणार आहे. राष्ट्रीय महामार्ग प्राधिकरण, जिल्हा प्रशासन, स्थानिक प्रशासन व पीएमआरडीए यांच्या संयुक्त विद्यमाने पुणे सातारा या महामार्गावरील दोन्ही बाजुचे अतिक्रमण काढण्याची कारवाई करण्यात येणार आहे.
तरी या रस्त्यावर दोन्ही बाजूला असलेली अतिक्रमणे सबंधितांनी काढून घ्यावी. अन्यथा प्रशासनाकडून ही अतिक्रमणे हटविताना काही नुकसान झाल्यास त्याला सबंधीत प्रशासन जबाबदार राहणार नाही. तसेच ही धोकादायक अतिक्रमणे त्वरीत न काढल्यास सबंधितांवर आपत्ती व्यवस्थापन कायदा 2005 अन्वये कारवाई करण्यात येईल. असे राष्ट्रीय महामार्ग प्राधिकरणाकडून सांगण्यात आले आहे. राष्ट्रीय महामार्ग प्राधिकरणाने याबाबतचे पत्रक प्रसिद्ध केले आहे.
