Pimpri News : पिंपरी : पिंपरी-चिंचवड महापालिकेतील स्थानिक अधिकाऱ्यांसाठीच्या अतिरिक्त आयुक्तपदी नगरसचिव उल्हास जगताप यांची निवड करण्यात आली आहे. १९ फेब्रुवारी २०२१ पासून त्यांच्याकडे प्रभारी पदभार होता. आता शासनाने त्यांच्या निवडीवर शिक्कामोर्तब केले आहे. याबाबतचे आदेश शासनाच्या उपसचिव प्रियांका कुलकर्णी-छापवाले यांनी दिले आहेत.
नव्या आकृतिबंधानुसार निवडीवर शिक्कामोर्तब
राज्य सरकारने १ सप्टेंबर २०१४ रोजी पिंपरी महापालिकेचा समावेश ‘ब’ वर्गामध्ये केला आहे. ‘ब’ वर्गात समावेश झाल्यामुळे महापालिकेचा नवा आकृतीबंध, सेवा प्रवेश व सेवांचे वर्गीकरण नियम तयार केले होते. महापालिकेच्या आकृतिबंधाला राज्य सरकारने मंजूरी दिली आहे. (Pimpri News) नवीन आकृतीबंधानुसार महापालिकेत तीन अतिरिक्त आयुक्तांची पदे निर्माण झाली आहेत. त्यातील दोन अतिरिक्त आयुक्त प्रतिनियुक्तीवरचे आणि महापालिका अधिकाऱ्यांकरिता पदोन्नतीसाठी एक याप्रमाणे तीन पदांची विभागणी करण्यात आली. राज्य सेवेतील प्रदीप जांभळे आणि विजय खोराटे हे दोन अतिरिक्त आयुक्त प्रतिनियुक्तीवरील आहेत. महापालिकेचे नगरसचिव उल्हास जगताप यांच्याकडे १९ फेब्रुवारी २०२१ पासून अतिरिक्त आयुक्तपदाचा प्रभारी पदभार आहे.
आयुक्त शेखर सिंह यांचा २ मे २०२३ रोजीचा प्रस्ताव आणि शासनाने अतिरिक्त आयुक्त पदावर निवडीने नियुक्तीसाठी स्थापन केलेल्या शासन स्तरावरील समितीची शिफारस विचारात घेवून नगरसचिव उल्हास जगताप यांची अतिरिक्त आयुक्तपदी निवड करण्यास शासनाने मान्यता दिली. (Pimpri News) जगताप यांना अतिरिक्त आयुक्त म्हणून दहा महिन्यांचा कालावधी मिळणार आहे. नगरसचिव पदाची जबाबादारीही त्यांच्याकडेच राहण्याची शक्यता आहे.
