पिंपरी : चिखली परिसरातील जाधववाडी येथे एका ट्रकने दुचाकीला जोरदार धडक दिली. या अपघातात दुचाकी वरील दोघांचा जागीच मृत्यू झाल्याची घटना घडली आहे. या घटनेने परिसरात हळहळ व्यक्त केली जात आहे. हा अपघात शनिवारी (दि. 23) सायंकाळी साडेसात वाजताच्या सुमारास घडला आहे. गणेश शहाजी देशमाने (वय-४१), हनुमंत जीवन धारवडकर (वय-४०) अशी अपघातात मृत्यू झालेल्या दोघांची नावे आहेत. हा अपघात झाल्यानंतर ट्रक चालक पळून गेला होता. मात्र, चिखली पोलिसांनी त्याला अटक केली आहे.
याप्रकरणी अनिकेत शहाजी देशमाने (वय-२६, रा. चिखली) यांनी चिखली पोलिस ठाण्यात फिर्याद दिली. त्यावरून पोलिसांनी हुलाजी उर्फ मोहन महादू सोडगीर (४२, रा. मोशी) याच्या विरोधात गुन्हा दाखल करून अटक केली आहे.
पोलिसांनी दिलेल्या माहितीनुसार, फिर्यादी यांचा भाऊ गणेश देशमाने आणि त्यांचा मेहुणा हनुमंत धारवडकर हे दुचाकीवरून जात होते. ते दोघे सावतामाळी रोडवर आल्यानंतर त्यांच्या दुचाकीला एका ट्रकने जोरदार धडक दिली. या अपघातात दोघांचा जागीच मृत्यू झाला. अपघात झाल्यानंतर ट्रक चालक पळून गेला. याबाबत चिखली पोलिस ठाण्यात तक्रार दाखल केली. त्यावरून पोलिसांनी फरार आरोपीला अटक केली आहे. या घटनेचा पुढील तपास चिखली पोलीस करत आहेत.
