पिंपरी-चिंचवड: पिंपरी-चिंचवड परिसरात मसाज सेंटरच्या आडून सुरू असलेल्या अवैध वेश्या व्यवसायावर पोलिसांनी पुन्हा एकदा कारवाई करत रिच फिल स्पा येथे छापा टाकला. या कारवाईत 3 तरुणींची सुटका करण्यात आली असून स्पाचा मॅनेजर अक्षय महादेव सुतार (वय 26) याला अटक करण्यात आली आहे. या प्रकरणात स्पा मालक मयूर मोहिते याच्यावरही गुन्हा दाखल करण्यात आला आहे.
सम्राट चौकातील या स्पामध्ये ‘मसाज सेवा’च्या नावाखाली देहव्यापार चालत असल्याची माहिती अनैतिक मानवी वाहतूक प्रतिबंध कक्षाला मिळाली होती. त्यानुसार सापळा रचून कारवाई करण्यात आली. तपासात समोर आलेल्या माहितीनुसार, ग्राहकांना आकर्षित करण्यासाठी सोशल मीडिया आणि स्थानिक नेटवर्कचा वापर केला जात होता. आर्थिक अडचणीत असलेल्या किंवा फसवून आणलेल्या महिलांचा या रॅकेटमध्ये वापर केल्याची शक्यता पोलिसांनी व्यक्त केली आहे.
अशा प्रकारच्या घटनांचा शहरात वाढता कल ही चिंतेची बाब मानली जात आहे. मसाज पार्लर आणि स्पा सेंटरच्या नावाखाली बेकायदेशीर कृत्ये लपवली जात असल्याने प्रशासनासाठी ही मोठी आव्हानात्मक परिस्थिती बनली आहे. विशेषतः तरुणींना नोकरीचे आमिष दाखवून किंवा दबावाखाली या व्यवसायात ढकलले जात असल्याचे अनेक प्रकरणांत समोर आले आहे.
पिंपरी-चिंचवडमध्ये यंदाच्या वर्षात अशा 8 ठिकाणी छापे टाकण्यात आले असून 20 आरोपींना अटक करण्यात आली आहे, तर 17 महिलांची सुटका करण्यात आली आहे. यावरून या प्रकारचे जाळे किती मोठ्या प्रमाणावर पसरले आहे, हे स्पष्ट होते. मागील काही वर्षांत अशा 29 आस्थापनांवर बंदीची कारवाई करण्यात आली आहे.
