प्रतिनिधी अमित मुंडीक
Pune News : पिंपरी चिंचवड : हरवलेल्या 18 वर्षांखालील बालकांचा शोध घेण्यासाठी राबविण्यात आलेल्या ‘ऑपरेशन मुस्कान–14’ या विशेष मोहिमेत पिंपरी चिंचवड पोलीस आयुक्तालयाने उल्लेखनीय कामगिरी करत तब्बल 121 हरवलेली बालके सुखरूप शोधून त्यांच्या कुटुंबीयांच्या ताब्यात दिली आहेत. महाराष्ट्र राज्यातील महिला व बाल अपराध प्रतिबंध विभागाच्या मार्गदर्शनाखाली 20 जानेवारी 2026 ते 20 फेब्रुवारी 2026 या कालावधीत ही मोहीम राबविण्यात आली. पोलीस आयुक्त विनय कुमार चौबे यांच्या सूचनांनुसार सर्व पोलीस ठाणे, गुन्हे शाखा व संबंधित यंत्रणांनी संयुक्त पथके तयार करून शोधकार्य हाती घेतले.
सन 2018 ते 20 जानेवारी 2026 या कालावधीत आयुक्तालयाच्या हद्दीत अपहरण व हरवल्याची एकूण 214 प्रकरणे नोंदविण्यात आली होती, ज्यामध्ये 30 बालके व 184 बालिकांचा समावेश होता. या पार्श्वभूमीवर राबविण्यात आलेल्या मोहिमेत जुन्या प्रकरणांतील 71 बालके (11 बालके व 60 बालिका) तसेच नव्याने दाखल झालेल्या प्रकरणांतील 50 बालके (16 बालके व 34 बालिका) शोधण्यात पोलिसांना यश आले. अशा प्रकारे एकूण 27 बालके व 94 बालिका मिळून 121 हरवलेली बालके सुरक्षित परत आणण्यात आली.
या मोहिमेची अंमलबजावणी पोलीस सहआयुक्त, अपर पोलीस आयुक्त व इतर वरिष्ठ अधिकाऱ्यांच्या मार्गदर्शनाखाली पार पडली. हरवलेल्या बालकांना त्यांच्या कुटुंबीयांपर्यंत सुरक्षित पोहोचविणे हे केवळ कायदेशीर कर्तव्य नसून सामाजिक जबाबदारी असल्याचे पोलिसांनी नमूद केले. या यशस्वी कामगिरीबद्दल नागरिकांकडून समाधान व कौतुक व्यक्त होत असून भविष्यातही अशा प्रभावी मोहिमा राबवाव्यात, अशी अपेक्षा व्यक्त केली जात आहे.
